“Bit-tama, kontra kull tama, Abraħam emmen, ħalli jsir missier ħafna ġnus, skont dak li ntqal lilu, ‘Hekk se jkun nislek.’ Bla ma ddgħajjef fil-fidi kkonsidra l-ġisem tiegħu nnifsu, issa mmewwet – billi kellu madwar mitt sena – u l-isterilità ukoll ta’ ġuf Sara. Frattant, inkwantu l-wegħda t’Alla, ma qagħadx indeċiż bl-inkredulità, iżda kien imsaħħaħ fil-fidi tiegħu, waqt li ta glorja ’l Alla, u kien persważ kompletament illi dak li wiegħed, Alla kien kapaċi wkoll jagħmlu. Konsegwentement il-fidi tiegħu ‘kienet kreditata lilu għall-ġustifikazzjoni tiegħu’” (Rumani 4:18-22).
It-tama hi verġni ta’ bixra sabiħa u attraenti: il-maqgħad proprju tagħha hu fuq l-art, l-oġġett proprju tagħha fis-sema. Il-fidi hi d-difensur tagħha, it-talb l-avukat tagħha, is-sabar it-tabib, il-karità l-almoner tagħha, il-gratitudni t-teżorier tagħha, il-konfidenza l-viċi-ammirall, il-wegħda divina l-ankra tagħha, is-sliem it-tron statali tagħha, u l-glorja eterna l-kuruna tagħha.
Dit-tama, imsejsa fuq il-qabar vojt barra minn Ġerusalemm, hi evidenti fejn l-imħabba t’Alla hi msawba fil-qalb bl-Ispirtu s-Santu mogħti lil dawk kolli li ħarsu b’fidi sinċiera lejn l-Awtur ta’ din l-istess tama. Timla l-qalb afflitta b’feliċità ġewwiena u konsolazzjoni eċċezzjonali, u kapaċi tidħaq imqar meta għajnejha mxarrba bid-dmugħ; tista’ titniegħed u tkanta fl-istess ħin, għax tikkonċentra fuq Kristu, u żomm sħiħ il-fiduċja u l-ferħ tagħha qawwija sat-tmiem.
Il-Kristjan jittama għal barkiet li għadu mhuwiex jarahom, ċoè l-qawmien mill-mewt, id-dħul tiegħu fil-glorja, xirka perfetta m’Alla Trinità, u għaldaqstant jistenniehom b’antiċipazzjoni u bis-sabar. Tabilħaqq, it-tama hi l-għata tiegħu, li bih jitgeżwer, saħansitra, anzi speċjalment, meta jkun wasal biex ġismu jitqiegħed fil-qabar. Bħal David jgħid, “Ġismi jistrieħ fit-tama.”
Mela qalb mondana, iffissata fuq ħwejjeġ trasjenti, ma tabbinax tajjeb ma’ tama smewwitija. Biex it-tama tkun mibnija b’saffejn, qabel xejn il-fidi trid tkun b’saħħitha, mitmugħa bil-Kelma u eżerċitata tajjeb. It-tama ma timradx meta l-fidi, seħbitha, takkumpanjaha. U bil-fidi, is-segwaċi tas-Sid jagħlfu t-tama tagħhom fuq il-karkassi tal-biżgħat maqtula tagħhom.
Talba: “Mulej Ġesù, int Alla tat-tama tiegħi. Bik inħares lil hinn mill-orizzont, għax tama f’affarijiet viżibbli mhijiex tama. Jekk l-oġġett narah, m’għandix għalfejn nittama għalih. Seddaqni bis-sabar u żommli l-ħarsa tal-fidi tiegħi fuqek, o Blata tas-salvazzjoni tiegħi, kemm għal ruħi kif ukoll għal ġismi. Ammen.”
Comments