“Għax ir-rabja t’Alla qed tkun irrivelata mis-sema kontra kull empjetà u inġustizzja tal-bnedmin li jissopprimu l-verità fl-inġustizzja, għaliex dak li jista’ jkun magħruf dwar Alla hu evidenti għalihom, għax Alla lilhom immanifestah. Għax l-attributi inviżibbli tiegħu – kemm is-setgħa dejjiema kif ukoll in-natura divina tiegħu – jidhru distintivament mill-ħolqien tad-dinja, mifhuma mill-ħwejjeġ magħmula, tant li huma bla skuża” (Rumani 1:18-20).
Alla mhu mkien, jew kullimkien? L-ateiżmu u l-Kristjaneżmu huma ż-żewġ pożizzjoni li ma jippretendu ebda inkonsistenza. Kwalunkwe filosofija bejniethom – deiżmu, anjostiċiżmu, edoniżmu, panteiżmu, u l-bqija – huma kollha kompromettenti. Jekk is-soċjetà tipprova tinbena fuq l-edoniżmu, pereżempju, ir-riżultat mhux diffiċli tindovinah bil-quddiem. Jirriżulta biss kaos u diżgwid.
Jekk Bin Marija mhuwiex ukoll Bin Alla, m’għandna ebda kawża soda kontra l-ateiżmu. Avolja xi atej huma biss atej fil-bnazzi, xorta rridu nkunu lesti nwaqqgħu l-fortizzi tagħhom, u nuruhom bħala nies li m’għandhom ebda mezz inviżibbli ta’ sapport. Il-battalja mhix ċajta, u ċ-ċaħda sfaċċata tal-Ħallieq qiegħda ssir kulma jmur voċifera u bla mistħija.
Alla żvela l-eżistenza tiegħu espliċitament. Nissupponu li student uiniversitarju hu inkarigat jikteb it-teżi tiegħu fuq l-atomu. Bla wisq tidwir mal-lewża, jiddikjara li ma jemminx fl-atomi għax ma jarahomx. M’għandu ebda prova viżibbli tagħhom. Jgħaddih il-professur, jew iwaħħlu? Allavolja ma narawhomx, l-atomi nafu li jeżistu mill-effetti rikonoxxuti tagħhom. Kull min hu midħla ta’ Hiroshima ma jara ebda lok jibqax jikkustinja dwar l-eżistenza tal-atomi jew le. Bl-istess mod, aħna responsabbli nirrikonoxxu lil Alla u s-setgħa eterna u ħallieqa tiegħu mill-effetti murija ċar fil-ħolqien tiegħu.
Talba: “Mulej setgħani, fil-bidu tkellimt u kmandajt, ‘Ħa jiddi d-dawl mid-dlam!’ u d-dawl noneżistenti obdiek. Hekk ukoll issa m’għandi ebda dubju intix hemm jew le, għax int stess iddejt f’qalbi biex iddawwalni bit-tagħrif tal-glorja tiegħek f’wiċċ Ibnek Ġesù. X’meravilja ta’ grazzja! Foħrija lilek, Sultan etern!”
Comments