“Nerfa’ għajnejja lejn l-għoljiet, minn fejn tiġi l-għajnuna tiegħi. Mill-Mulej tiġi l-għajnuna tiegħi, hu li għamel is-sema u l-art. Hu ma jħallix lil riġlek jogħtor; dak li jħarsek ma jongħosx. Ara, dak li jħares lil Iżrael la jongħos u lanqas jorqod. Il-Mulej il-protettur tiegħek; il-Mulej hu dellek fuq lemintek. Ix-xemx ma tolqtokx binhar, lanqas il-qamar billejl. Il-Mulej iħarsek minn kull deni; hu iħarislek ruħek. Il-Mulej iħares il-ħruġ u d-dħul tiegħek, minn issa u għal dejjem ta’ dejjem” (Salmi 121:1-8).
Huwa għaqal, anzi, dehen minn fuq, li nkunu kapaċi nagħtu direzzjoni korretta għall-mistennija u t-talb tagħna. Il-viżjoni tas-salmista hi ffokata strettament fuq id-destinazzjoni finali tiegħu, Ġerusalemm, u Sijon, l-għolja t’Alla. Mhux faċli twaħħal ħarstek fid-direzzjoni profitabbli, meta bosta attrazzjonijiet oħra jlellxu madwarna. Fi żmien il-prova, aħna ninstabu inklinati żżejjed biex niksbu għajnuna minn ħwejjeġ instabbli, biex insibuhom biss bħal qasba mġelġla li taqsmilna idna.
Hi ħniena kbira mingħand il-Mulej meta bl-Ispirtu tiegħu jgħallimna li m’hemm ebda sokkors fi bnedmin bħalna. Tafdax f’xi ħadd li hu nnifsu dipendenti fuq il-Mulej omnipotenti. Il-kult tal-qaddisin fil-knisja Rumana hu żvijjatura serja; in-nies spiċċaw iffissaw il-ħarsa tagħhom fuq il-qaddisin, flok mhuma jagħmlu kif għamlu l-qaddisin infushom, ċoè, jiffissaw id-devozzjoni tagħhom esklussivament fuq Kristu.
Għajnuna effettiva tista’ “ddum” ma tiġi, imma tiġi biss mingħand il-Mulej, u ħadd aktar. Tinterpretax dil-verità biblika, ċertissma, b’dak li jaraw għajnejk. Alla waħdu hu suffiċjenti. Il-bnedmin u l-anġli, mezzi u strumenti, il-qawwiet magħquda tal-art, u l-għerf tal-ħlejjaq kollha huma inqas mix-xejn, paragunati m’Alla omnipotenti. Fih biss inkunu sikuri.
F’dan ir-rigward jaqbel nistudjaw l-għemejjel tal-ħolqien. Goethe sejjaħ il-kreazzjoni fit-totalità tagħha, “Das lebendiges Kleid,” il-libsa ħajja. Jiżvela s-setgħa u l-perfezzjonijiet l-oħra t’Alla b’manjiera importanti wisq għalina li nifhmu. Dal-ktieb bl-istampi ma naffordjawx inħalluh fuq l-ixkaffa. Qabel ma niksbu konċett adegwat tal-omnipotenza t’Alla, ma naslux biex niddependu fuqu, għal kulma neħtieġu, sew ikel u lbies, kif ukoll maħfra u barkiet spiritwali.
Jixraq inkunu nafu mnejn taslilna l-għajnuna għax il-mogħdija tagħna matul ħajjitna hi miżgħuda b’perikli u ażżard, u faċli niżolqu u nogħtru fil-korsa tagħna. Fina nfusna qisna ħafura. Stramba kif ma nkunux rovinati totalment, meta x-xitan, id-dinja, u l-laħam ifittxu jkissruna b’persistenza inkredibbli. Imma meta niftakru li Alla hu t-tama ta’ niesu, il-misterju hu spjegat.
Il-viġilanza ta’ Jaħwe fuq il-wirt tiegħu hija ammirabbli daqskemm meħtieġa. Imqar is-sentinell, li jaf li l-piena hija l-mewt jekk jittraskura xogħlu, kultant jongħos fil-posta tiegħu. Mhux hekk il-Mulej!
Talba: “Il-wegħdi tiegħek, o Alla omnipotenti, huma sħaħ u ma jaqgħux fit-trab. Huma stabbiliti fis-smewwiet, u bil-fidi nsarrfuhom. Żommilna l-ħarsa tal-fidi fuqek, is-Sultan sovran, biex la ninsew min aħna u lanqas x’inhi l-vokazzjoni għolja tagħna. F’isem Ibnek, il-Medjatur tagħna, nitolbuk. Ammen.”
Comments