“Wieħed mill-kriminali mdendla hemm insultah, ‘Ewwilla m’intix il-Messija, int? Salva lilek innifsek u lilna!’ Imma l-malefattur l-ieħor ċanfru. ‘Int lanqas tibża’ minn Alla,’ qallu, ‘ladarba tinsab taħt l-istess sentenza ta’ kundanna? Aħna tabilħaqq ġustament, għax qegħdin nirċievu lura x’ħaqqna għal li għamilna, imma dan ebda misfatt m’għamel.’ Imbagħad qal, ‘Ġesù, ftakar fija meta tiġi f’saltnatek!’ Ġesù wieġbu, ‘Tassew ngħidlek, illum se tkun miegħi fil-Ġenna’” (Luqa 23:39-43).
L-iblah jgħid, “Meta jfettilli nista’ naqta’ l-vizzju u nerġa’ għan-normal.” Xi stupidaġni! Ma jafx illi l-indiema, daqskemm hi obbligu u dmir tiegħu, hi wkoll għotja minn fuq. Il-Mulej ta wegħda għall-indiema mwaħħra, iżda mkien u qatt ma lissen wegħda ta’ ndiema mwaħħra.
Ħadd m’għandu għalfejn jinganna bih innifsu billi jirreferi għall-każ tal-ħalliel penitenti, salvat fl-aħħar siegħa fuq is-salib, u meħud il-Ġenna dakinhar stess ma’ Kristu. Dan l-att kien turija speċjali tal-grazzja t’Alla, biex jikkonvinċina kemm tabilħaqq aħna salvati skont ħnientu, u mhux skont l-opri tagħna – għax il-malefattur ma kellu xejn affattu x’joffri lill-Mulej ħlief jammetti li kien ħaqqu s-sentenza ta’ mewt. Idejh kienu mimlija bis-serq, totalment vojta mill-virtù.
Il-Mulej daħħlu f’saltnatu bla ma kellu xejn x’jirrikmandah – kif preċiżament għamel magħna wkoll! Il-fatt li salvah fl-aħħar mumenti jservi bħala esibizzjoni dejjiema għalina illi niddependu esklussivament fuq ħnientu, u mhux fuq il-merti tagħna. Merti personali, għalkemm sikwit jidhrilna li għandna, attwalment m’għandniex.
Talba: “Sidna Ġesù, m’aħniex agħar jew aħjar mill-ħalliel mislub maġenbek, għax aħna lkoll dnibna u neqsin mill-glorja tiegħek. Jekk ma tlibbisniex int, nibqgħu għarwenin; jekk ma tilliberaniex int, nibqgħu bil-ktajjen; jekk ma tnaddafniex u tagħmilna kwalifikati għall-Ġenna, b’ebda mod ma nidħlu fiha. O kemm infaħħruk, għax bħalma lqajt lill-ħalliel ilqajt lilna. Grazzi!”
Comments