“Bil-fidi Mosè, meta twieled, kien moħbi għal tliet xhur mill-ġenituri tiegħu, għax raw li t-tifel kien sabiħ, u ma beżgħux mill-editt tas-sultan. Bil-fidi Mosè, meta kiber, irrifjuta milli jkun imsejjaħ iben bint Faragħun. Ħatar aktarx li jkun immaltrattat mal-poplu t’Alla milli temporanjament ikollu t-tgawdija tad-dnub. Ikkonsidra l-għajb ta’ Kristu bħala għana ikbar mit-teżori tal-Eġittu, għax kien qed iħares lejn il-premju. Bil-fidi ħalla l-Eġittu warajh, bla ma beża’ minn għadab is-sultan, għax issaporta, bħallikieku qed jara lill-Inviżibbli. Bil-fidi għamel l-Għid u t-traxxix tad-demm, sabiex il-qerried ma jmissx il-primoġeniti tagħhom.” (Ebrej 11:23-28).
Id-dnub hu kkastigat bid-dnub. Sikwit Alla sempliċement iħalli r-reprobati jgħassdu aktar fl-inikwità li fiha xibilku lilhom infushom, bla rażan. Aktar ma wieħed jogħdos fil-konkupixxenza u l-laxxivja aktar jitmewwet għas-safa u l-qdusija. Bħalma l-lebbruż ma jibqax iħoss l-uġigħ tal-ġrieħi, hekk ukoll jitlef is-setgħa biex japprezza l-ġmiel tal-virtù u fl-istess ħin ma jiddiżgustax ruħu aktar bl-abominazzjonijiet tal-vizzju. Il-prattika tal-ħażen tista’ tiżviluppa fi speċi ta’ reliġjon. Timplika mhux biss ħajra u sentiment, imma wkoll intelliġenza u intenzjoni deliberattiva.
X’invenzjoni dijabolika kienet “il-bewsa tal-verġni,” implimentata fl-antik mill-padri tal-Inkwiżizzjoni! Il-povru vittma kien jisfa mbottat biex ibus ix-xbieha, meta, ħabta u sabta, dirgħajha jħaddnuh fi tħaddina fatali, u ttaqqablu ġismu bi xfafar innumerabbli, misturin fiha. Hekk il-pjaċiri midinba joffru propjament dit-tali bewsa tal-verġni. L-heniet vulgari tal-laħam iwasslu, imqar f’did-dinja, għal riżultati l-aktar imwiegħra, mentri fid-dinja li ġejja l-istalletti tar-rimors u d-disprament ifieru u jqattgħu lil hinn minn kull rimedju.
Frattant it-twissijiet min qed jagħti kashom? Mosè ħa azzjoni f’waqtha, ibbażata fuq deċiżjoni għaqlija. Frattant il-qagħda ta’ ħafna mhix wisq aħjar minn ta’ far maqbud fin-nassa. Bi skerz inqabad minn denbu, u l-povra ħlejqa baqgħet tiekol il-ġobon. L-impenitenti jagħmlu l-istess; jafu li huma ħatja u jinsabu mwerwra mill-kastig, u xorta waħda jibqgħu jgerrmu d-dnubiet maħbuba tagħhom, li jġibuhom f’rovina finali.
Imma dan mhux kollox. Virtù kkalkolat, imkewwes bil-kuċċarina, għandu wkoll min-natura tal-vizzju. Ultimament, in-nies twajba huma twajba minħabba li huma maħtura bħala reċipjenti tal-ħniena divina. Fihom hemm operattiva l-grazzja, ineffabbilment, effettivament u misterjożament. Il-grazzja biss tagħmel id-differenza ultima. Għalhekk, meta t-twajba, matul is-serriegħa tagħhom fl-arena, josservaw kif telaqhom il-vizzju, m’għandhomx b’daqshekk jikkongratulaw lilhom infushom bħallikieku huma telqu l-vizzju.
Għax id-dnub jista’ jeżawrixxi ruħu, u t-tiġrija toqrob lejn tmiemha, u ż-żmien jasal għall-konsumazzjoni tiegħu, u kull bżonn jintlaħaq, imma l-ħniena ddum għal dejjem.
Talba: “Mulej ħanin, int ma tistmaniex bħala lsiera iżda bħala ħbiebek; urejtna mqar x’hemm jistenniena fil-futur. Kellimtna dwar l-eternità u l-immortalità tar-ruħ, kif ukoll dwar ir-resurrezzjoni ta’ ġisimna fl-aħħar jum. Tħalliniex naraw sa xiber imneħirna. Għallimna ngħixu fid-dawl tal-eternità. Hekk ikun.”
Comments