“B’dan hi pperfezzjonata l-imħabba fostna, sabiex ikollna kunfidenza f’jum il-ġudizzju, għax bħalma hu Ġesù, aħna wkoll aħna f’did-dinja. M’hemmx biża’ fl-imħabba, anzi l-imħabba perfetta tixħet ’il barra l-biża’, għax il-biża’ jinvolvi l-kastig, u min jibża’ mhux ipperfezzjonat fl-imħabba. Aħna nħobbu għax hu ħabbna l-ewwel. Jekk xi ħadd jikklejmja, ‘Inħobb ’l Alla,’ u frattant jobgħod lil ħuh, hu giddieb, għax min ma jħobbx lil ħuh li ra ma jistax iħobb ’l Alla li ma rax. U dal-kmandament għandna mingħandu: min iħobb ’l Alla jmissu jħobb ukoll lil ħuh” (1 Ġwanni 4:17-21).
Kull wieħed minna intenzjonat biex jesibixxi l-karattru tiegħu nnifsu, ikun dak li ħaddieħor mhuwiex, u jagħmel dak li ħaddieħor mhux imsejjaħ biex jagħmel. Meta jien trasparenti miegħi nnifsi, u nagħraf l-identità partikolari tiegħi, imbagħad iseħħ dak li naqraw f’Shakespeare:
“Fuq kollox dan – kun veru miegħek innifsek,
U jirriżulta, bħalma l-lejl wara n-nhar jiġi,
Illi ma tkun falz ma’ ebda bniedem ieħor.”
Mhux biss għandi d-dritt insir individwu, imma aktar minn hekk, għandi obbligu sagru biex nilħaq dan l-għan. Ma nista’ nagħti ebda kontribut sinifikanti fl-iżvolġiment tal-istorja jekk ma nwettaqx dil-vokazzjoni smewwitija tiegħi. Il-viżjoni tiegħi ma tibqax ambigwa, anzi, issir luċida u tippressa fuqi meta nittawwal f’qalbi, għax bħalma l-bniedem jaħseb f’qalbu, hekk hu. Min iħares ’il barra, joħlom. Min jixref fuq ġewwa, jistenbaħ.
Mela, aktar ma nkun fidil miegħi nnifsi, inkun jien u mhux fotokopja ta’ ħaddieħor, aktar inqarreb lejn il-bersall. Mill-mument li naċċetta lili nnifsi kif jien, it-toqol kollu, ir-remiżolji fixkiela, l-avversità qalila, jidħlu fil-perspettiva tagħhom, u l-konundru nsiblu tarfu. Il-ħajja ssir ferħ pur distillat, btala ta’ dwal, aurora borealis.
Riżolviment: Ħa nkun jien innifsi, għax min isib lilu nnifsu jinfatam mill-miżerja.
Proġett: Għal dawn il-ġimgħat li ġejjiin neżerċita lili nnifsi biex niddetermina s-suċċess tiegħi, mhux billi nikkompara lili nnifsi ma’ nies oħra, imma aktarx billi nqabbel il-kisbiet tiegħi mal-kapaċitajiet tiegħi. Nilħaq il-mira biss meta nagħmel l-aħjar b’li għandi, jum wara jum.
Ispirazzjoni: “Kull bniedem imissu jfittex bil-mod tiegħu biex jagħmel lilu nnifsu aktar nobbli u jirrealizza d-den veru tiegħu” (Albert Schweitzer, missjonarju mediku Franċiż).
Mela abbasso l-biża’ u t-twerwir! Ħa nterraq il-mogħdija waħdi, jekk hemm bżonn, imbasta naf li hi l-mogħdija tiegħi. Nixmi matulha, twassalni fejn twassalni; ma rridx inħossni li qed insegwi l-passi ta’ xi ħadd – ħlief ta’ Ġesù. Għax bħalma t-trasgressjoni tiegħi kienet magħduda bħala t-trasgressjoni tiegħu fuq il-Kalvarju, hekk il-Via Crucis saret il-vija tiegħi, u l-ħajja tal-irxoxt tiegħu l-ħajja tiegħi. Hekk inkun illiberat mil-labirint li jwassal biss għad-disprament.
Talba: “Tini l-għerf u d-dixxerniment, Missier, ħalli nkun naf id-den veru tiegħi, u ma nintilifx. Int tajtni t-tagħrif, biex b’dawlu mhux biss inqimek, imma wkoll nara lili nnifsi fid-dgħufija u s-saħħa tiegħi. Skont il-grazzja mogħtija lili mmotivani biex nuża d-doni tiegħi għall-avvanz ta’ sħabi u ħuti, kif ukoll għas-sebħ tiegħek. F’isem Ġesù Ibnek, ħa jkunli dan.”
Comments