“Tkunux idolatri, bħal xi wħud minnhom; bħalma hu miktub: ‘In-nies poġġew jieklu u jixorbu, u qamu jilagħbu.’ M’għandniex niffornikaw, bħalma xi wħud minnhom iffornikaw, u mietu tlieta u għoxrin elf f’jum wieħed. M’għandniex inġarrbu lis-Sid, bħalma xi wħud minnhom ġarrbuh, u kienu meqrudin mis-serpenti; lanqas tgemgmu, kif xi wħud minnhom gemgmu, u kienu meqrudin mill-anġlu qerried. Issa dawn il-ħwejjeġ ġraw lil dawk in-nies bħala eżempji, u nkitbu bħala ammoniment għalina, li fuqna wasal it-twettiq taż-żminijiet. Għalhekk min jidhirlu li jinsab wieqaf fis-sod għandu joqgħod attent li ma jaqax! Ebda tiġrib ma qabadkom ħlief dak li hu komuni għall-umanità. Però Alla hu fidil, u mhux se jħallikom tkunu mġarrbin lil hinn milli kapaċi tifilħu, iżda mat-tiġrib jipprovdi l-ħruġ ukoll, ħalli tkunu tistgħu tissaportuh” (1 Korintin 10:6-13).
It-tiġrib jippreżenta ruħu attraenti; iwiegħed il-kuntentizza, almenu kuntentizza temporanja. Imma qatt ma jiġi b’idejh vojta – joffrili s-sodisfazzjon, jimlili xi vojt li nkun inħoss. Issa ilna nħawdu l-ħażin mat-tajjeb, u l-iswed insejħulu abjad, u l-imgħawweġ narawh dritt u viċe versa. Il-problema bażika ta’ Adam hi l-problema tiegħi llum, taħt suriet u forom differenti. Kieku t-tentazzjoni m’hemmx allaċċjata magħha l-wegħda li nista’ nsir aktar smart, it-tentazzjoni titlef il-karattru tagħha. Saħansitra l-Iskrittura tammetti li fid-dnub hemm il-pjaċir, għalkemm hu pjaċir transitorju. Hu gost għaddieni, imma reali għan-natura midinba tagħna.
Ġieli f’portijiet barranin tara l-baħrin mill-bastimenti tagħhom jilliskaw il-gawwi u tjur oħra, jiffollaw mal-poppa. Is-sunnara jgħabbuha b’ċappa xaħam, u minnufih nofs tużżana gawwi jħebbu għaliha, u l-baħrin itellgħu t-tajriet waħda wara l-oħra. Minkejja l-issarar tal-maqbudin abbord, u minkejja l-istorbju tal-kru, it-tjur l-oħra baqgħu jittajru u jgħumu mal-poppa. Imqar dawk li nqabdu u ħarbu ma żammewx lura milli jerġgħu jipprovaw jirbħu x-xaħam għat-tieni darba. Hekk il-ħżiena jlebbtu biex jibilgħu l-liskiet ta’ Satana. Anke meta jaraw lil ħaddieħor jintilef diżastrożament, jibqgħu bla kont, u avolja jafu li għad jiddestruġġu lilhom infushom, jippersistu bl-infatwazzjoni miġnuna tagħhom.
Allura x’inhi t-tarka tiegħi? Nagħraf u nkun persważ mill-estremità tal-imħabba divina, biex imbagħad nirrispondi għaliha b’imħabba minn qalbi. Imqar jekk tkun eku, biżżejjed, imma jrid ikun eku ġenwin. Jekk l-għożża tax-xirka tiegħi m’Alla mhix isħaħ mit-tentazzjoni, nieħu t-tuffieħa – bil-merkurju injettat fiha.
Talba: “Ja Sid kumpassjonali, int tifhem minn xiex jien magħmul u x’insarraf. Mitluq waħdi nogħtor, naqa’ u nweġġa’; inkasbar ismek. Allura għattini b’rixek, u taħt ġwenħajk affordjali l-kenn; hu jkun is-sewwa tiegħek it-tarka u l-korazza tiegħi, biex hekk negħleb kontra kull qawwa tal-għadu, nirfes fuq l-iskorpjuni, u ebda lifgħa ma tagħmilli ħsara. F’isem Ġesù. Ammen.”
Comments