“Kollox għandu żmienu, u kull ħaġa għandha waqtha taħt is-sema: waqt biex titwieled u waqt biex tmut; waqt li tħawwel u waqt li taqla’ l-imħawwel; waqt li toqtol u waqt li tfejjaq; waqt li tibki u waqt li tidħaq; waqt li tagħmel il-vistu u waqt li tiżfen; waqt li tarmi l-ġebel u waqt li tgeddes il-ġebel; waqt li titgħannaq u waqt li titbiegħed mit-tgħanniq; waqt li tfittex u waqt li titlef; waqt li terfa’ u waqt li tarmi; waqt li tqatta’ u waqt li tħit; waqt li tiskot u waqt li titkellem; waqt li tħobb u waqt li tobgħod; waqt ta’ gwerra u waqt ta’ sliem” (Ekkleżjażti 3:1-8).
Is-solitudni, bħal-lupi bir-ragħwa f’ħalqu, tissajja fid-dellijiet tal-avversità, lesta biex taqbeż fuqi. Jgħidu fjakkola mkebbsa tgerrex lil-lupu u ma jersaqx lejk. Jheddek, imma jibqa’ distakkat. Il-fjakkola hi biss il-komunjoni li nista’ mmantni kostantement, bla interruzzjoni, mal-Missier. Imma rrid inżommha f’idi, mhux nitlaqa’ quddiem l-għarix. U nieħu ħsiebha, mhux nittraskuraha.
Inġerragħ is-solitudni mis-soċjetà; id-distakk mill-familja jaf ikun insapportabbli. Id-dar inħobbha. Li mmantni atmosfera akkoljenti fid-dar importanti, għax jekk wieħed iħossu mhux milqugħ ikun waqa’ f’faqar inesprimibbli. Ladarba Alla laqagħna, ma nistax ma nilqax nies sikwit antipatiċi bħali.
Għal kull ħaġa hemm staġun, u ħin għal kull attività taħt is-sema. Bħalma kelli ħin iffissat għal twelidi, hemm ieħor biex immut. Bħalma ġieli bkejt, se jkun hemm okkażżjonijiet għad-daħq. Bħalma jasal żmien iż-żrigħ, hemm ukoll żmien il-ħsad. Saħansitra hemm waqt għall-gwerra, bħalma hemm waqt għas-sliem. Imma prattikament, għall-andament komuni minn jum għall-ieħor, jidhirli xejn mhu aktar kruċjali milli tagħraf il-waqt xieraq biex titkellem, u l-waqt xieraq biex issikket ħalqek. Din biss tiffrankali ħafna gwaj.
Meta ninzerta f’xalata ta’ ferħ, mhix idea banali niftakar fis-solitudni, għax imbagħad abbli nkunu kapaċi niftakar fil-ferħ meta s-solitudni jċarratli laħmi bla mistenni. Miġruħ, napplika tfejjiqa għalija nnifsi.
Talba: “O Alla Ħallieq tagħna, int għamiltna biex ngħixu f’kumpanija ma’ nies oħra, u nibnu relazzjonijiet sinifikanti bejnietna. Meta nkun imwarrab, fakkarni illi int dejjem miegħi, u li qatt ma jien inqas solitari milli meta nfittex lilek fit-talb u t-tifħir tiegħi għalik kull ħin. Żommli idi u mexxini tul ix-xagħri ta’ dil-ħajja sakemm twassalni fid-dar imwiegħda, permezz ta’ Ibnek Ġesù. Ammen.”
Comments