“Meta ġejt għandkom, l-aħwa, jien ma ġejtx innidilkom ix-xhieda t’Alla b’superjorità ta’ diskors jew ta’ għerf. Għax iddeterminajt li ma nkun naf ebda ħaġa fostkom ħlief lil Ġesù Kristu, u lilu imsallab. Jien kont magħkom bi dgħufija u b’biza’, u b’ħafna tregħid. Il-messaġġ u l-predikazzjoni tiegħi ma kinux bi kliem persważiv ta’ għerf, iżda f’dimostrazzjoni tal-Ispirtu u tas-setgħa, sabiex il-fidi tagħkom ma tkunx tistrieħ fuq l-għerf ta’ bnedmin, iżda fuq is-setgħa t’Alla” (1 Korintin 2:1-5).
Kif nittrasmettu l-bxara t-tajba huwa kruċjali. Ma naffordjawx nippermettu l-moda filosofika moderna tiddettalna l-kontenut tal-messaġġ jew il-metodoloġija kif se nikkomunikawh.
Biex nillustra: kappella ċkejkna f’raħal Ingliż kellha l-ħitan tagħha miksija bil-liedna tradizzjonali. Fuq l-arkata tal-bieb kellha mnaqqxa s-sentenza Pawlina, “Aħna nippritkaw lil Kristu msallab.” Ġenerazzjoni ta’ nies twajba hekk għamlet, preċiżament: xejn u ħadd ma seta’ jfixkilhom milli jgħallmu lil kulħadd li l-bniedem hu magħdud ġust quddiem Alla bil-fidi fi Kristu, li għamel tpattija perfetta għal dnubietna, u mhux bl-ubbidjenza tagħna għal-liġi.
Iż-żminijiet inbidlu. Il-liedna baqgħet tikber u ksiet l-aħħar kelma. Issa l-iskrizzjoni saret taqra hekk: “Aħna nippritkaw lil Kristu.” Il-kongregazzjoni kienet sodisfatta illi tisma’ dwar Kristu bħala l-Eżempju tagħna, Kristu l-Għalliem Ideali, Kristu l-Umanitarju.
Insebqu xi snin oħra, u l-liedna baqgħet tiffjorixxi sakemm l-iskrizzjoni ġiet tgħid hekk: “Aħna nippritkaw.” U veru, għax is-suġġetti koperti f’dik il-kappella kienu diversi: in-nies drat tisma’ dwar il-vanġelju soċjali, dwar l-ekonomija, ir-rwol tal-mara fil-politika, reċensjonijiet dwar kotba ppubblikati, insomma, dwar elf tema taħt is-sema.
Jekk ma ngħassux fuqna nfusna, kemm faċilment nistgħu nirrigressaw! Pawlu jisħaq ma’ sieħbu, “Ipprietka l-kelma; sus fi żmienu u barra minn żmienu; ikkonvinċi, ċanfar u inkuraġġixxi – b’paċenzja kbira u tagħlim” (2 Timotju 4:2). Fejn hi l-enfasi tagħna llum? M’aħniex inkarigati biex inxandru s-soċjoloġija, imma s-salvazzjoni; mhux l-ekonomija, iżda l-evanġelju; mhux ir-riforma, iżda r-ridenzjoni ta’ Kristu; mhux il-kultura, imma l-konverżjoni; mhux il-progress tal-gnus, iżda l-propizjazzjoni bis-salib tal-Kalvarju; mhux ir-rivoluzzjoni, imma r-riġenerazzjoni tal-Ispirtu; mhux organizzazzjoni ġdida, iżda ħolqien ġdid fi Kristu; mhux id-demokrazija, iżda s-saltna t’Alla; mhux iċ-ċiviltà, imma ċ-ċentralità ta’ Kristu.
Filwaqt li nixtiequ nkunu diplomatiċi, essenzjament aħna ambaxxaturi tas-Sultan; il-messaġġ fdat lilna mhuwiex għad-diskussjoni, mhuwiex abbozz għall-approvazzjoni tal-esperti. Diġà għandu t-timbru u s-siġill irjali.
Talba: “Mulej Ġesù, lilek ingħatat kull awtorità fis-sema u fl-art. Kmandajtna nwettqu ministeru f’ismek. Tħalliniex allura nkunu mgerrxa jew intimidati mill-għadu, aktar u aktar meta nafu li d-disfatta tiegħu hi ċerta. Agħtina li nitkellmu Kelmtek bil-konfidenza, b’dipendenza fuqek, b’imħabba lejn in-nies.”
Comments