“Hu bi grazzja tal-Mulej li aħna ma ntemmejniex għalkollox, għax il-ħniniet tiegħu ma jonqsu qatt; jiġġeddu kull filgħodu. Kbira l-fedeltà tiegħek! Il-Mulej sehmi, tgħid ruħi; għalhekk nittama fih. Tajjeb il-Mulej għal dawk li jittamaw fih, għar-ruħ li tfittxu. Tajjeb li wieħed jittama u jistenna bil-kwiet is-salvazzjoni tal-Mulej. Tajjeb għal wieħed li jerfa’ l-madmad minn żgħożitu. Ħa joqgħod waħdu u ma jitkellimx xħin il-Mulej jgħabbihulu!” (Lamentazzjonijiet 3:22-28).
Il-fedeltà t’Alla! Hi ogħla mis-sħab, ifnad mill-oċean immens. Il-fidi tagħna tista’ togħtor kultant, u niddiżappuntaw imqar lilna nfusna; iżda l-fedeltà t’Alla ma tfalli qatt. Bħal ħnientu, hi ġdida kull filgħodu. Kbira hi l-fedeltà tiegħu! Għax bħalma Alla fil-bidu m’għażilnix għax kont fl-għoli, hekk issa ma jabbandunax ħidmietu fija għax ninsab fil-baxx. Alla jżomm Kelmtu, iżomm il-patt; mhuwiex bniedem bħalna biex jigdeb, jew instabbli bħalna biex jerġa’ jibdielu. “Alla hu fidil, li bih intom issejjaħtu għax-xirka m’Ibnu Ġesù Kristu.” “Fidil hu dak li sejħilkom, u li wkoll jagħmel dan,” ċoè, iqaddisna għalkollox u jtemm il-kapulavur tal-grazzja tiegħu f’ruħna u ġisimna.
Il-Mulej ipprojbixxa lill-Iżraeliti milli jinsew x’għamel favorihom, kif emanċipahom mill-jasar ta’ Faragħun, kif ħelishom mill-eżerċtu tiegħu, kif introduċiehom fl-art li wegħidha lil Abram u lil nislu, kif keċċa l-ġnus minnha, kif reġġagħhom lura mill-eżilju – sensiela interminabbli ta’ atti emiena daparti tiegħu, u dan fuq sfond ta’ infedeltà sikwit grassa fost il-Lhud. Kuntrast skonfortabbli tassew! Iżda Alla jridna niftakru illi bħalma kien fidil, hekk iridna niċċelebraw il-fedeltà tiegħu, għax il-fedeltà divina ma tistax tinqaleb f’xi ħaġa oħra. “Dak li beda xogħol tajjeb fina jipperfezzjonah sal-jum ta’ Kristu.”
Alla għandu fih innifsu kull potenza biex jiddefendik, kull dehen biex jidderiġik, kull ħniena biex jaħfirlek, kull grazzja biex jagħni lil ruħek, kull ġustizzja biex ilibbsek biha quddiemu, kull tjieba biex jissupplixxi bżonnijietek, kull kuntentizza biex jinkuruna lil rasek, kull fedeltà biex iżommok fil-familja tiegħu! Taqlax ħarstek minn fuqu! Fih kull suffiċjenza.
Talba: “O Alla, int Alla tiegħi; mas-sebħ infittxek jiena. Ruħi għatxana għalik; ħa nixrob mill-għajn perenni tiegħek! Ħeġġiġni biex nagħrfek aħjar; qarribni lejn qalbek. Biegħed minni kull bruda jew indifferenza għall-ħwejjeġ spiritwali, għax int tissodisfali kull xewqa u kull desiderju. Grazzi għall-bontà tiegħek lejja, bi Kristu Ibnek. Ammen.”
Comments