“Imbagħad Ġesù qalilhom, ‘Dal-lejl intom ilkoll se tkunu offiżi minħabba fija. Għax hu miktub: “Se nolqot lir-ragħaj u jitferrxu n-nagħaġ tal-merħla.” Imma wara li nkun irxoxtat, immur qabilkom fil-Galilija.” Pietru rrispondih, ‘Imqar jekk kulħadd se jkun offiż minħabba fik, jien qatt mhu se nkun offiż.’ ‘Tassew ngħidlek,’ qallu Ġesù, ‘f’dal-lejl stess, qabel ma jidden is-serduq, tiċħadni tliet darbiet.’ Iżda Pietru ddikjara, ‘Anke jekk ikun jeħtieġli mmut miegħek, qatt mhu se niċħdek!’ L-istess ħaġa wkoll qalu d-dixxipli kollha” (Mattew 26:31-35).
Meta nkunu maħsudin, ħabta u sabta, ninkixfu minn tabilħaqq aħna. Jekk għandek il-ġrieden u firien fil-kantina, iċ-ċans li tarahom huwa jekk tinżel fil-kantina għall-għarrieda. L-entratura tiegħek għall-għarrieda ma toħloqx il-ġrieden, imma biss ma ħallitilhom ebda opportunità biex jistaħbew. Bl-istess mod, l-aħjar evidenza għal x’tip ta’ persuna int tinsab fir-reazzjoni tiegħek meta ma tkunx viġilanti. Pereżempju, provokazzjoni fid-daqqa u l-ħin ma tagħmlikx rasek sħuna, imma hi prova kemm int maħkum minn spirtu ta’ għadab.
Ħu l-bniedem fl-erba’ elementi tiegħu, tal-art, l-arja, in-nar u l-ilma. Fl-art, hu għabra ttir; fl-arja, hu fwar qed jisparixxi; fl-ilma, hu bużżieqa qed tinfaqa’; u fin-nar, hu duħħan soffokanti. Osservazzjonijiet xejn kumplimentużi.
Dan l-assessment mhuwiex wieħed pessimist; hu wieħed realist. “X’inhu l-bniedem?” Jekk tistaqsi lil Isaija, jgħidlek, “Kull bniedem bħall-ħaxix.” Jekk tikkonsulta ma’ David, bla tidwir mal-lewża jgħidlek, “Il-bniedem hu gidba,” mhux giddieb biss, jew ingannatur, imma “gidba.” It-tweġibiet, imqanqla mill-Ispirtu tal-verità, ma jneffħuniex; aktarx jumiljawna. Ma jumiljawniex biex niddispraw bla tama, imma jiddisprawna minna nfusna, biex infittxu sokkors band’ oħra. In-natura umana tagħna hi għadu għan-natura t’Alla, fil-qdusija u l-ġustizzja tiegħu; kieku l-bniedem jiġih iċ-ċans, jaqla’ lil Alla mit-tron sovran tiegħu. Imma, kos, iċ-ċans ġieh, u mhux biss neżżgħu mill-abiti rjali iżda qatlu fuq il-Golgota.
Talba: “Imħabbtek, Jaħwe, tilħaq lill-ħlejjaq kollha tiegħek! Aktar minn hekk, għadek sal-lum tgħolli lill-bniedem lejn il-Ġenna tiegħek. Bi dnubna rridu bħallikieku nċekknu, jew agħar, ninnegaw, lilek, Alla l-kbir. U xorta waħda int tkabbar lill-bniedem, minkejja l-monstrożità ta’ dnubu! Dan hu tassew ir-renju tal-grazzja! Irċievi mingħandna, il-mifdija tiegħek, tifħir u sebħ!”
Comments