“Jien mela, il-priġunier għas-Sid, neżortakom ħalli timxu denjament tas-sejħa li biha kontu msejħin, b’kull umiltà u manswetudini, bil-paċenzja, tissaportu ’l xulxin fl-imħabba, tħabirku ħalli tippriżervaw l-unità tal-Ispirtu fir-rabta tas-sliem” (Efesin 4:1-3).
Fil-programm etiku mfassal għal ulied Alla, Pawlu minn kmieni jintroduċi sabar, jew paċenzja, bħala ingredjent essenzjali u sabiħ. Bih imissna niżżejnu bla dewmien.
X’inhu s-sabar? L-Isqof Horne joffrielna did-deskrizzjoni. “Is-sabar hu l-gwardjan tal-fidi, il-priżervatur tas-sliem, il-ħabbej tal-imħabba, l-għalliem tal-umiltà. Is-sabar jiggverna l-karnalità, isaħħaħ l-ispirtu, jagħmel ħelwa t-tempra, jifga l-korla, jitfi l-ġelożija, jgħakkes il-kburija.
“Is-sabar isarram l-ilsien, jirrestrinġi l-id, u jgħaffeġ fuq it-tentazzjonijiet. Jissaporti l-persekuzzjonijiet u jikkonsma ruħu fil-martirju.
“Is-sabar jipproduċi l-unità fil-knisja, il-lealtà fl-istat u l-armonija fil-familji u s-soċjetajiet. Jikkonforta l-fqajrin u jimmodera s-sinjuri. Jagħmilna umli fil-prosperità, feliċi fl-avversità, stabbli kontra l-kalunnji u l-għajb. Is-sabar jgħallimna naħfru lil kull min iweġġagħna, u nkunu l-ewwel nies biex nitolbu maħfra lil dawk li offendejna.
“Is-sabar jgħaxxaq lill-fidili u jistieden lill-miskredenti. Iżejjen lill-mara u japprova lir-raġel. Hu sabiħ fil-maskil u l-femminil, u f’kull età. Ara l-bixra u l-ilbies tiegħu! Wiċċu kalm u seren bħal wiċċ is-sema bla makkja tal-iċken ħajbura. Ebda tikmixa ta’ għali jew għadab ma titfaċċa fuq ġbinu. Għajnejh qishom għajnejn il-ħamiem għall-manswetudni tagħhom; fuq ħuġbejh tara l-hena u l-feliċità. Fommu attraenti fis-skiet; il-karnaġġjon u lewnu huma mdakkra mill-innoċenza u s-sigurtà. Hu mixdud bi lbies il-martri; f’idu jżomm xettru f’għamla ta’ salib. Ma jirkibx fil-belliegħa u t-tempesti feroċi tal-passjoni, imma t-tron tiegħu jinstab f’qalb umli u niedma, u saltnatu hi saltna sielma.”
Talba: “Missier omnipotenti, int paċenzjuż, tissaportina u ddum biex tagħdab. Ħa nkunu nixbhuk! Żejjinna bis-sabar ħalli jkollna l-potenzjal inwettqu l-ikbar proġetti u naraw il-wetqa ta’ pjanijiet fenomenali. Bih nibdew bis-sospiri iżda nispiċċaw bi tbissima. Seddaqna bil-grazzja biex la nogħtru u lanqas naqtgħu jiesna f’wiċċ it-tiġrib. Għall-ġieħ ta’ Ibnek, u f’ismu, nitolbuh dan. Ammen.”
Comments