“Meta s-sħab ikun mimli xita, iferrgħuha fuq l-art; u jekk taqa’ siġra, lejn Nofsinhar jew lejn it-Tramuntana, fejn taqa’ tibqa’. Min joqgħod għassa tar-riħ ma jiżra’ qatt; u min joqgħod iħares lejn is-sħab, ma jaħsadx. Bħalma ma tafx it-triq tar-riħ u kif isir l-għadam fil-ġuf ta’ mara tqila, hekk int ma tafx għemil Alla li jagħmel kollox” (Ekkleżjażti 11:3-5).
Għaliex, mela, nitkexkxu mis-sħab li bħalissa qed idallam is-sema tagħna? Veru, għal ftit ħin jaħbi x-xemx, iżda b’daqshekk ix-xemx ma tintefiex. Ma jdumx ma terġa’ tiddi. Sadattant dak is-sħab iswed hu mimli xita. Iżjed mhu suwed, iżjed irodd raxxiet kotrana. Kif jista’ jkollna xita mingħajr sħab?
Il-gwaj tagħna dejjem ġabilna barkiet, u jibqa’ jipproduċilna barkiet. Huwa l-karru mudlam tal-grazzja leqqiena. Dan is-sħab jitbattal fi żmien qasir, u kull ħaxixa tar-raba’ tistejqer bl-ilma tiegħu. Alla tagħna jista’ jxarrabna għasra bl-għali, iżda ma jgħarraqniex bl-għadab; anzi, jiffriskana bil-ħniena.
Aktar ma nirriflettu fuq mogħdijietu aktar nipperswadu ruħna b’liema sapjenza u ħniena jittratta magħna. L-ittri ta’ mħabba mingħand il-Mulej huma mwassla lilna f’enviloppi indurati bl-iswed. Il-karettuni tiegħu jżaqżqu, iżda huma mgħobbija bil-benefiċji tiegħu għalina. Il-ħatar tiegħu jwarrad bi fjuri ħelwa u frott li jmantnina. Ħalli ma ninkwetawx bis-sħab, iżda ngħannu għax il-fjuri mlewna ta’ Mejju jiftħu minħabba s-sħab u x-xita t’April.
Talba: “El Xaddaj, is-serafini u l-kerubini u l-anġli tas-sema għalenija jgħidulek kontinwament, ‘Qaddis, qaddis, qaddis, il-Mulej Alla tal-eżerċti; is-smewwiet u l-art huma mimlija bil-glorja tiegħek.’ Iva, o Alla, is-sħab hu t-torba ta’ riġlejk! Kemm tinsab qrib fil-jum imsaħħab u mudlam! L-imħabba tarak, u tifraħ. It-tama tisma’ bik, u tiżfen bil-ferħ. Bil-fidi nilmħu s-sħab ibattlu lilhom infushom u jagħmlu l-għoljiet ferħana fuq kull naħa. Ħalleluja! Ammen.”
Comments