“L-imħabba ta’ Kristu tikkontrollana, billi kkonkludejna dan, illi wieħed miet għal kulħadd, u għalhekk ilkoll mietu. U miet għal kulħadd, sabiex dawk li jgħixu ma jmisshomx jgħixu iżjed għalihom infushom, iżda għal dak li miet għalihom u kien irxoxtat. Għalhekk aħna, minn issa ’l quddiem, ma nistmaw lil ebda wieħed minn perspettiva mondana. Għalkemm darba stmajna lil Kristu minn perspettiva mondana, madankollu issa ma nafuhx iżjed hekk. Għalhekk, jekk xi ħadd hu fi Kristu, hu ħolqien ġdid. Il-ħwejjeġ qodma għaddew; ara, saru ġodda! Dan kollu hu mingħand Alla, li rrikonċiljana miegħu nnifsu permezz ta’ Kristu u tana l-ministeru tar-rikonċiljazzjoni, ċoè, Alla kien qed jirrikonċilja d-dinja miegħu nnifsu fi Kristu, bla ma jgħodd l-offiżi tagħhom kontrihom. U kkommettielna l-kelma tar-rikonċiljazzjoni” (2 Korintin 5:14-19).
Irridu naħsbu bil-ħsieb t’Alla biex niġu f’postna. Il-problema u l-isfida hi waħda: ħsibijietu radikalment differenti minn ħsibijietna. Ma tistax tersaq lejn Alla l-kbir u tibqa’ kif tkun, iffissat fuqek innifsek u ingrat u suspettuż. Ikollok iċċedi kollox, ikollok tikklirja moħħok, ikollok bżonn qalb ġdida u għajnejn f’fakoltà ġdida.
Meta tirrikorri lejn Alla, tkun qisek ħarist min-naħa l-oħra tas-sema. Tara l-istess affarijiet iżda minn punto di vista differenti. Id-difett tiegħek, li darba seta’ jkun skużat f’dinja trivjali, issa hu serju u kbir. L-indiema, appuntu, mhi xejn ħlief il-kisba ta’ perspettiva ġdida: tara d-dnub b’lenti differenti, il-ħwejjeġ eterni minn perspettiva differenti. Tevalwa l-affarijiet mill-angolu t’Alla. Jekk Ġesù kont tikkonsidrah bħala dik il-figura mċajpra b’seħer idilliku, issa tarah b’vista kkoreġuta. Tarah kif jarah il-Missier. Tintebaħ illi fih għoġob il-Missier illi tgħammar il-milja kollha.
Meta nwarrab ħsibijieti dwar il-ħajja sabiex nikseb il-ħsibijiet t’Alla, Kristu jsir l-għotja ta’ qalb Alla għalija, Ħellies li fih tikkonsisti l-qawwa tal-ħajja ġdida tiegħi, Dawwal li mingħandu nitgħallem kif imissni naħseb dwar Alla u l-bniedem. “Għalhekk,” jissorprendina l-appostlu, “jekk xi ħadd hu fi Kristu, hu ħolqien ġdid. Il-ħwejjeġ qodma għaddew; ara, saru ġodda!”
Il-ġudizzji qodma tiegħek, l-istima u l-ivvalutar tiegħek, jinbidlu radikalment. Issib lilek innifsek f’dinja bħallikieku rinovata. Attwalment tkun int ir-rinovat. Issib lilek innifsek tgħum f’ambjent bħallikieku nadif. Attwalment tkun int il-maħsul u l-imnaddaf.
Ebda psikologu, ebda antropologu, ebda profesur, ebda edukatur, ebda riformista, ebda soċjologu mhu kapaċi jintroduċi bidla bħal din. Ħadd ħlief Kristu! Hi r-rieda ridentiva t’Alla, li kapaċi jissuġġetta kollox għalih innifsu.
Talba: “Mulej Alla omnipotenti, diġà bdejt xogħol tajjeb fija. Diġà ġġustifikajtni u issa qed tissantifikani. Għadni xogħol għaddej. Hu xogħlok li għad jilħaq il-kompletezza tiegħu mal-parusija ta’ Ibnek Ġesù. Għax int ma tikkuntentax b’nofs miżuri. Infaħħrek għall-imħabba rebbieħa tiegħek. Ammen.”
Comments