“Imbagħad Ġesù qalilhom parabbola ħalli jurihom illi huma dejjem jeħtieġ jitolbu u ma jintelqux. Qal: ‘Kien hemm wieħed imħallef f’ċerta belt li la kien jibża’ minn Alla u lanqas jirrispetta lill-bniedem. U kien hemm armla f’dik il-belt li baqgħet tiġi għandu u tgħidlu, “Agħmilli ħaqq mill-avversarju tiegħi.” Għal xi żmien irrifjuta, imma finalment qal fih innifsu, “Għalkemm la nibża’ minn Alla u lanqas nirrispetta lill-bniedem, madankollu, minħabba li din l-armla qed tissokta tħabbatni, se jkolli nagħmlilha ġustizzja, ħalli ma tibqax tiġi kontinwament u tispiċċa biex teżawrini.”’ U s-Sid qal, ‘Isimgħu x’jgħid l-imħallef inġust. U ewwilla Alla mhux se jagħmel ġustizzja għall-magħżulin tiegħu, li jgħajtulu nhar u lejl? Se joqgħod itawwalha magħhom? Ngħidilkom, se jara li jiksbu ġustizzja, u fil-pront. Madankollu, meta jiġi Bin il-Bniedem, se jsib fidi fuq l-art?’” (Luqa 18:1-8).
It-talb fih privileġġi. Ruħ mixħuta quddiem it-tron tal-grazzja qatt ma tista’ tkun miżerabbli ħafna, avolja abbli tinsab f’kondizzjoni mwiegħra, għax jekk tersaq b’fidi sinċiera diġà rebħet widnet il-Mulej. Għandha l-Ispirtu f’unjoni mistika magħha hekk illi jgħallimha tressaq it-tnegħid tagħha. Għandha Ħabib Paraklitu fis-smewwiet biex jidher għaliha, u lill-Missier innifsu biex jilqa’ xewqatha bla ma jlum. It-talb, fih innifsu, hu ħniena, avolja qatt ma nirċievi l-ħniena rikjesta, għax sikwit Alla jbusna fil-bidu tat-talb, jippronunzja s-sliem tiegħu matul il-ħin tat-talb, u jimlina bil-ferħ u l-assigurazzjoni fi tmiem it-talb!
Aktar ma nipprogressaw fil-mixja evanġelika, aktar ma joktru l-grazzji u l-barkiet t’Alla fuqna, bil-wisq aktar neħtieġu illi ninħbew fih bit-talb, bħala t-torri setgħan u t-tarka tagħna, għax Satana jitbeżżel kontrina. Dawk li qabdu t-triq tal-maturità iridu joqogħdu attenti li ma jitneffħux bi qdusija taparsi.
Inqisu wkoll illi ma nimminimizzawx it-talb komunitarju. Hemm prevalenza meraviljuża fit-talb unit ta’ niesu. Meta Pietru safa maqful il-ħabs bla tort xejn, il-knisja m’għamlet ebda protesta pubblika, ebda marċ, ebda appell il-qorti, ebda plejtu, ebda petizzjoni ffirmata mill-eluf. Aktarx, l-aħwa ltaqgħu u talbu lil Alla smewwieti, u meta kollox deher bla tama, intbagħat anġlu bit-tama u ħelsien. Hemm wegħda speċjali annessa mat-talb pubbliku. “Fejn tnejn jew tlieta jiltaqgħu flimkien f’ismi,” jgħid Ġesù, “hemm inkun jien f’nofshom.” Strettament kien qed jirreferi għal każijiet ta’ dixxiplina fil-knisja, iżda l-wegħda hi wiesa’ biżżejjed biex tinkludi attivitajiet oħra għall-unur tiegħu.
Id-dewmien fit-twettiq tal-petizzjonjiet tagħna m’għandux jiskuraġġina jew jaqtagħlna qalbna; wisq inqas għandu jħajjarna nikkonkludu li t-talb hu biss eżerċizzju psikoloġiku. Alla jittratta magħna bħala wliedu, u jrid jgħallimna s-sabar u l-perseveranza. L-armla baqgħet tiffitta lill-imħallef inġust sakemm għamlilha ħaqq fil-kawża tagħha. Jekk imħallef tad-demm u l-laħam bħalna hu kajman u bla interess, iżda jaġixxi biex ma jisfax mifni bit-tostaġni u l-imprudenza tal-atturi, kemm aktar Missierna!
Talba: “Inbierkek f’kull żmien, o Mulej; jien provajtek u rajt kemm int tassew twajjeb. It-tifħir tiegħek ikun dejjem fuq fommi. Ruħ tiftaħar bik; inxandar il-kobor tiegħek u ngħolli ismek ma’ ħuti kollha u mal-ħolqien kollu. Inroddlok ħajr talli tismagħni u teħlisni mill-biża’ u l-ansjetà. Ammen.”
Comments