Mogħtija Sinifikat

“Infatti, waqt li konna għadna dgħajfin, Kristu fi żmien proprju miet għall-empji. Rarissmu xi ħadd jasal biex imut għal bniedem ġust, madankollu għal bniedem tajjeb xi ħadd forsi jissogra saħansitra jmut. Imma Alla jesibixxi l-imħabba tiegħu nnifsu lejna, billi filwaqt li konna għadna midinbin, Kristu miet għalina. Mela, billi issa ninsabu ġustifikati b’demmu, bil-wisq iżjed se nkunu salvati mir-rabja t’Alla permezz tiegħu! Għax jekk, filwaqt li konna għadna għedewwa, konna rrikonċiljati m’Alla permezz tal-mewt t’Ibnu, bil-wisq iżjed, billi issa ninsabu rrikonċiljati, se nkunu salvati b’ħajtu! Mhux hekk biss, iżda wkoll neżultaw f’Alla permezz ta’ Sidna Ġesù Kristu, li permezz tiegħu issa rċevejna r-rikonċiljazzjoni” (Rumani 5:6-11).

Ħafna nies, speċjalment b’miżura ta’ edukazzjoni, iħossuhom mitlufa fl-immensità tal-univers, meta jafu l-kobor tal-galassji bi xmux innumerabbli fihom. Iħossuhom fraka. Ilkoll għaxtana għall-imħabba, u lkoll iħossu kemm hu importanti illi jkunu sinifikanti għal xi wħud oħra, almenu. 

Frattant, mal-għerq ta’ bosta ħajjiet, hemm assenza virtwali ta’ kull sinifikat. Iż-żgħażagħ tagħna, partikolarment, li fiż-żminijiet moderni għandhom tieqa miftuħa faċilment għall-bqija tad-dinja, jistgħu jiftaħru li għandhom kollox – ħlief raġuni sodisfaċenti għall-ħajja.

Hawnhekk l-osservazzjoni tal-filosfu atew, Jean-Paul Sartre, tesprimi dal-punt b’forza: “Hawn aħna, ilkoll kemm aħna, nieklu u nixorbu biex nippriżervaw l-eżistenza prezzjuża tagħna – u frattant m’hemm xejn, xejn, assolutament ebda raġuni għala neżistu.” Nistgħu saħansitra nagħtu isem għal das-sentiment ta’ nuqqas ta’ sinifikat – nistgħu nirreferu għalih bħala “vakwu eżistenzjali.” B’daqshekk ma solvejniex il-problema; inkunu qed nagħrfuha biss. Xorta waħda nħossuna solitari u mitlufa, f’univers hekk vast illi jhedded jiblagħna. 

Dan is-sentiment ta’ nuqqas ta’ sinifikat hu trasformat bid-dikjarazzjoni xokkanti illi Alla – l-istess Alla li ħalaq iż-żmien, il-materja u l-ispazju – iħobbna. L-imħabba tagħti tifsira għall-ħajja. Il-persuna maħbuba ssir speċjali għal xi ħadd, tassumi sinifikat illi altrimenti ma jkollhiex. Il-Kristjaneżmu jagħmel asserzjoni li kull semmiegħ messu jitbellah biha: Alla hu profondament interessat fina u kkonċernat għalina. Din id-dikjarazzjoni ssib il-prova sostanzjali u inkonfutabbli tagħha fil-ħajja, il-mewt u r-resurrezzjoni ta’ Ġesù Kristu. 

Għal Alla nfissru xi ħaġa: Kristu miet għalina. Bil-fidwa tiegħu aħna speċjali f’għajnejn Alla. Kristu ġie biex iġibna lura mill-art imbiegħda, fejn aħna l-ħaljin u vili konna qed ninfnew bil-ġuħ. Ġie biex ireġġagħna lura għand il-Missier, li jħobbna u jistenna bil-ħerqa l-indiema tagħna. 

F’nofs univers immens u intimidanti, aħna mogħtija sinifikat u tifsira bir-realizzazzjoni illi Alla li ġab id-dinja fl-eżistenza, li ħalaqna fuq ix-xbieha tiegħu, ukoll iħobbna u jimportah minna. F’Ibnu bagħat salvataġġ. B’salibu ta prova tal-perfezzjoni tal-imħabba divina lejn dinja stupidita u ma temminx.

Talba: “Missier tal-verità, neħħi minna s-sofistikazzjoni ta’ żmienna u x-xettiċiżmu li ġie fuqna, bħall-ġlata, biex jherri l-fidi tagħna u jdgħajjifha. Ġibna lura għal dik il-fidi evanġelika li tagħmilna kbar u qawwija quddiemek, fidi li timmotivana biex inħobbuk u ngħixu quddiemek, fidi li biha ngawdu t-trijonf ta’ Ibnek irxoxtat, fidi li biha nimxu pass pass fil-preżenza tiegħek. Grazzi immensament talli tajtna sinifikat, wieħed u sodisfaċenti. Nitolbuk treġġagħna lura għal dik il-fidi sempliċi, bħal tat-tfal, fidi f’Alla omnipotenti u sovran, biex int waħdek tkun imsebbaħ.”