“David staqsa lill-Mulej, u l-Mulej qallu: ‘La titlax dritt għalihom, iżda dur għal warajhom, u tiġi fuqhom quddiem is-siġar tal-balsmu. U jiġri, xħin tisma’ ħoss ta’ mixi fil-quċċata tas-siġar tal-balsmu, intefa’ malajr għat-taqbida, għax imbagħad il-Mulej jimxi quddiemek biex ikisser l-eżerċtu tal-Filistin.’ Imbagħad David għamel hekk, bħalma kkmandah il-Mulej, u kisser il-Filistin minn Geba sa ma tasal Geżer” (2 Samwel 5:23-25).
Meta l-Mulej jitħarrek għandna nitħarrku aħna. L-Ispirtu t’Alla jonfoħ fejn jogħġbu, u aħna nisimgħu l-ħoss tiegħu. Dan hu l-ħin propizju għalina meta jmissna niċċaqilqu iżjed minn qatt qabel. Jeħtieġ naħtfu l-opportunità, u nisfruttaw kull bieb miftuħ. Jonqos minna li niġġieldu kontra l-Filistin kull ħin; iżda meta l-Mulej innifsu joħroġ quddiemna, għandna nkunu speċjalment qalbiena fit-taqbida.
Iż-żiffa ħarrket il-qċaċet tas-siġar; David u niesu interpretaw dan bħala sinjal biex jattakkaw. Malli avvanzaw kontra l-għadu, il-Mulej innifsu darab il-Filistin. Forsi l-istaġun meta nirbħu ħafna erwieħ għas-saltna wasal. Ħa nżommu widnejna miftuħa biex nisimgħu t-tħaxwix tar-riħ, u moħħna dejjem lest biex jobdi s-sinjal.
Alla l-kbir tana wegħda: “Imbagħad il-Mulej jimxi quddiemek biex ikisser l-eżerċtu tal-Filistin.” M’għandhiex din tkun inkuraġġiment biżżejjed biex nġibu ruħna ta’ rġiel? Ladarba l-Mulej joħroġ qabilna, ma nissograwx nibqgħu lura.
Talba: “Alla u Missier Sidna Ġesù, agħtina llum ftuħ biex nitkellmu għalik ma’ ħafna minn ħbiebna u qrabatna. Int titħassar in-nies mitlufa, imtaqqla bid-dnub u l-ħtija. Bħalma bgħattna għandhom, żejjinna bil-kumpassjoni tiegħek lejhom. Ħa nkunu dejjem għassa biex nagħmlu l-aħjar li nistgħu meta naraw il-bieb miftuħ, ħalli nappellawlhom jilqgħu r-rikonċiljazzjoni maħduma f’Ibnek Ġesù. Ammen.”
Comments