Il-poplu t’Alla jista’ jbiegħ lilu nnifsu fil-jasar minħabba dnubu stess. Ħasra li jkollhom jieklu l-frott morr, u jitfixklu f’għerq hekk qares. Xi skjavitù huwa dan meta wlied Alla jinbiegħu taħt il-madmad tal-ħażen u d-diżubbidjenza, jinżammu bil-ktajjen minn Satana, jiċċaħdu mil-libertà, jinsterqu mill-qawwa fit-talb, u jitilfu l-għaxqa tagħhom fil-Mulej! Lott hekk ġralu meta nfired minn ma’ żijuh Abraħam u mar joqgħod f’Sodoma, fejn ruħu tnikktet bil-perversità tal-abitanti t’hemm, iżda qajla għadda testimonjanza tajba fosthom. Meta wissiehom illi Alla kien wasal biex jeqridhom, ħasbuh qed jiċċajta!
Ħa ngħassu li ma mmorrux ninqabdu fit-tali jasar. Għandna biżżejjed nies li forsi anke nafuhom personalment, illi ma tantx żammew fit-triq id-dejqa, kif jirrekjiedi minna l-evanġelju. Jekk diġà ġralna hekk, ma niddisprawx mill-ħniena t’Alla; Missierna jibqa mimli kumpassjoni lejna. Sakemm fadallek in-nifs, qatt mhu tard wisq għall-indiema.
Ma nistgħux ninżammu fil-jasar għal dejjem. Il-Mulej Ġesù ħallas prezz għoli wisq għall-fidwa tagħna biex imbagħad jerħina f’idejn l-avversarju. Xtrana għalih innifsu; issa jien tiegħu u hu tiegħi. It-triq tal-ħelsien hi din: “Erġgħu lura lejn il-Mulej, Alla tagħkom.” Fejn sibna s-salvazzjoni l-ewwel darba, hemm nerġgħu nsibu t-tgawdija tagħha.
Is-salib ta’ Kristu jġegħilna nammettu dnubietna u hekk insibu maħfra u ħelsien. Barra minn hekk, il-Mulej iridna nobdu leħnu skont dak kollu li kmandana, u jeħtieġ nagħmlu dan b’qalbna kollha u b’ruħna kollha. Imbagħad jintemm il-jasar tagħna. F’ubbidjenza stretta għal Sidna ngawdu l-libertà tagħna.
Malli narmu l-idoli tagħna u mmilu f’ubbidjenza quddiem Alla l-ħaj, titneħħa minn fuqna d-dipressjoni tal-ispirtu u l-miżerja kbira ta’ ruħna. M’aħniex imsejħa biex nibqgħu lsiera għall-ideat tad-dinja, għall-passjonijiet żienja tagħna nfusna jew għal Satana.
Nistgħu nirritornaw mill-iktar fis possibbli biex minn issa ngawdu u ngħixu dik iċ-ċittadinanza ta’ Ġerusalemm smewwitija. “U dan agħmluh, billi tafu ż-żmien preżenti, illi diġà waslet is-siegħa għalikom biex tkunu mqajmin mill-irqad, għax issa s-salvazzjoni tagħna hija eqreb milli meta emminna fil-bidu. Il-lejl avvanza u l-jum qorob. Ħa narmu mela l-opri tad-dlam u ħa nilbsu l-armi tad-dawl” (Rumani 13:11-12).
Talba: “Mulej, fi ħnientek u l-fedeltà kbira tiegħek, li biha ma tinsiex il-patt tiegħek magħna, reġġagħna lura mill-jasar! Tħalliniex nużaw il-libertà tagħna bħala skuża biex nitbiegħdu minnek, iżda aktarx żommna taħt il-protezzjoni tiegħek, mgħaxxqin bik u miexja dejjem fi triq il-kmandamenti u l-preċetti tiegħek. Agħmilna għorrief biex nibnu darna fuq il-blat.”
Comments