“O Mulej, la ċċanfarnix fl-għadab tiegħek, lanqas twiddibni fis-saħna tiegħek. Għax il-vleġeġ tiegħek daħlu fija, u idek tagħfas wisq fuqi. Xejn m’hemm sħiħ f’ġismi minħabba għadbek, lanqas m’hemm ebda mistrieħ għal għadmi minħabba dnubi. Għax il-ħażen tiegħi tela’ ’l fuq minn rasi; bħal tagħbija tqila, tqila wisq għalija. Nitnu l-ġrieħi tiegħi u jdennu minħabba l-bluha tiegħi. Ninsab milwi għalkollox, wiċċi lejn l-art; il-jum kollu mlibbes l-iswed” (Salmi 38:1-6).
Jekk naħsbu b’leġġerezza dwar id-dnub, u ngħoddu l-inikwità bħala ċajta, evidentement inkunu qed nuru li d-dawl tal-evanġelju għadu ma ppenetrax f’ruħna. Għadna ma nafux xi jfissru l-passjoni u l-mewt tas-Salvatur. Għadna maqbudin taħt il-qerq u l-ingann tad-dnub. L-infidili qajla għandhom għali għall-ħażen tagħhom, ħlief meta jinqabdu fix-xbieki tagħhom stess. Biss meta Ġesù hu magħruf fil-qalb, id-dnub imbagħad hu tabilħaqq mistmerr, abbandunat, missielet u megħlub.
Il-fidil iħoss it-tagħbija tal-ħtija u t-toqol tad-dnub fuq il-kuxjenza tiegħu. Hi agunija insapportabbli. Forsi taħseb li dan hu kontradittorju għad-dikjarazzjoni illi, “Issa m’hemm ebda kundanna għal dawk li huma fi Kristu Ġesù” (Rumani 8:1), jew inkonsistenti mal-isfida trijonfanti, “Min se jġib xi akkuża kontra l-magħżulin t’Alla?” (Rumani 8:33).
Jeħtieġ nifhmu illi għalkemm l-akkuża u l-kundanna għad-dnub jistgħu jinġiebu minn Satana, ix-xellej, u l-liġi tista’ tikkundanna, u l-ispirtu tagħna jkollu jammetti illi aħna midinbin, frattant Alla tal-patt, il-Feddej tagħna, m’għandu ebda kundanna kontra tagħna. Diġà għabba lil Ibnu Ġesù bid-dnubiet tagħna. Allura wegħidna, “Fi ħtijiethom u fi dnubiethom ma niftakarx iżjed” (Ġeremija 31:34).
Xi wħud jipprotestaw. Jgħidu, din il-pożizzjoni tħajjar lin-nies ikomplu jidinbu; tneħħi kull sens ta’ ħtija. Din hi kritika serja kontra Alla tal-grazzja u l-imħabba! Min jasal biex jirraġuna hekk? Biss dawk li jiċħdu l-verità divina, u ma jemmnux fl-imħabba dejjiema tiegħu. Jiġġudikaw biss mill-prinċipji korrotti tagħhom infushom. Il-fatt hu illi l-erwieħ fidili għal Kristu jitniegħdu taħt it-toqol ta’ dnubhom. Jobogħdu kull ħażen u jfittxu jimmortifikawh.
Ġesù hu t-Tabib li jfejjaqna u jħaffef it-toqol minn fuq ruħna. Inutli nfittxu solliev band’ oħra. Xejn ma jikkwieta r-ruħ imnikkta u sogħbiena aktar minn dil-verità: Ġesù attwalment tgħabba bid-dnubietu ta’ niesu, bata għalihom adegwatament, u għamel tpattija perfetta biex jaqlagħhom id-dritt għall-Ġenna.
Talba: “O Alla, issa li wassaltilna fehma tajba tal-evanġelju u emminnieh, x’libertà din! X’serħan, issa li l-moħħ jirrealizza li kull dejn hu kkanċellat bid-demm tal-Ħaruf! Int l-Imħallef suprem, u ddikjarajtna ġusti bil-merti tas-sagrifiċċju tal-Kalvarju! Tgħoddna bla ħtija, għax il-ħtija xħitta fuq is-Sostitut tagħna, Ġesù! Agħtina illi nkomplu niffestiġġjaw fuq imħabbtek; imlielna qlubna b’aspirazzjonijiet biex nimxu fil-mogħdija evanġelika. Ammen.”
Comments