“Anġlu ieħor, it-tielet wieħed, segwiehom u qal b’leħen għoli, ‘Jekk xi ħadd jadura d-dbib u l-immaġni tiegħu u jirċievi marka fuq ġbinu jew fuq idu, hu wkoll għad jixrob mill-inbid tal-għadab t’Alla, imsawwab pur fil-kies tar-rabja tiegħu, u jkun itturmentat bin-nar u l-kubrit fil-preżenza tal-anġli qaddisin u fil-preżenza tal-Ħaruf. U d-duħħan tat-turment tagħhom jitla’ għal dejjem ta’ dejjem. M’għandhomx mistrieħ la bi nhar u lanqas billejl, dawk li jaduraw id-dbib u l-immaġni tiegħu, u kull min jirċievi l-marka t’ismu.’ Hawn hi s-sejħa għall-perseveranza daparti tal-qaddisin, li jżommu l-kmandamenti t’Alla u l-fidi tagħhom f’Ġesù” (Rivelazzjoni 14:9-12).
Aħna mwissija dwar l-għadab li ġej. Il-frażi timplika kemm il-futurità kif ukoll il-perpetwità ta’ dan l-għadab divin. Mhux biss hu realtà ċerta fil-futur, iżda meta jitferra’ jkun għadab li jibqa’, għadab li jkompli jkun għadab. “It-turment tagħhom jitla’ għal dejjem ta’ dejjem.” Ħsieb bħal dan jaqsam il-qalb. Meta miljuni ta’ snin ikunu għaddew, xorta waħda jibqa’ għadab li ġej, dejjem ġej bħal xmara tgelgel bla waqfien.
Hekk hu fl-Infern; iridu jmutu, bla ma jistgħu. Maqtugħin u eżiljati permanentement milll-preżenza konfortabbli tal-Ħallieq, iridu jeħilsu minnhom infushom, iżda d-duda tagħhom ma tmutx u n-nar ma jintefiex. Dawn huma realtajiet li jagħmluna sobriji, mentri xi wħud oħra jirribellaw kontra l-avvertiment. Jisħqu li huwa kattiv, ħarex u makabru, bla ma jindenjaw jaħarbu għall-kenn imqiegħed quddiemhom, għand Ġesù, li huwa unikament kompetenti biex jeħlisna minn dan l-għadab, għax ħadu fuqu nnifsu fuq is-salib. Alla dawwar ħarstu minn fuqu biex jilqa’ lilna. Jekk, però, nirroftaw is-sagrifiċċju propizjatorju, kif nistgħu neħilsu jekk nittraskuraw salvazzjoni kbira bħal din?
Il-pazjent, b’marda terminali, jekk jirrofta l-intervent kirurġiku, ikun qed jikkundanna lilu nnifsu għall-mewt. Wisq agħar jinsab il-bniedem bħala midneb. Kemm ikun aħjar għalih kieku qatt ma twieled! Kemm ikun preferibbli għalih in-nikilazzjoni ta’ persuntu! Iżda le. “Ir-ruħ li tidneb tmut” (Eżekjel 18:4), mhux fis-sens li ma tibqax teżisti, iżda fis-sens li ssofri turufnament dejjiemi minn Alla, li fil-preżenza tiegħu biss hemm il-milja tal-ferħ.
Inutli bħalissa niddibattu r-rivelazzjoni divina. Kristu fetħilna għajnejna; tkellem fuq l-Infern aktar milli nixtiequ. Ma nafux fejn hu iżda ċertament jeżisti. Meta inkwiżitur kurjuż staqsa lil Wistin x’għamel Alla qabel ma ħoloq id-dinja, l-isqof ta’ Ippona qallu li kien qed jipprepara l-Infern għal kurżitajri bħalu, li m’għandhomx x’jagħmlu ħlief illi jikkwistonjaw u jispekulaw.
Ftit jimportana fejn jinsab l-Infern. Huma l-egħref nies dawk li jqattgħu ħinhom u ħsibijiethom, u jagħmlu l-almu kollu tagħhom biex jibqgħu barra mill-Infern, aktarx milli jeżerċitaw lilhom infushom f’disputi dwaru.
Talba: “Mulej Ġesù, sforz imħabbtek lejna vżajtna ripetutament dwar id-dlamijiet ta’ barra, fejn ħafna jkunu kkonsenjati minħabba ħżunithom. Fil-Ġenna tiegħek ma jidħol xejn li jħammeġ. Għand min naħrab biex insib refuġju, jekk mhux għandek, ja Ħaruf t’Alla? B’demmek tnaddafni u tagħmilni kwalifikat għal dar Missierek fis-smewwiet. Grazzi tal-wegħda tiegħek illi kull min jiġi għandek int ma tkeċċihx ’il barra.”
Comments