“Ikkonsidrawh kollu ferħ, ħuti, kull meta tiffaċċjaw tiġrib varju, billi tafu illi l-ipprovar tal-fidi tagħkom jiżviluppa l-perseveranza. U ħa jkollha l-perseveranza r-riżultat perfett tagħha, sabiex tkunu perfetti u kompluti, bla mankanza f’xejn. Jekk xi ħadd minnkom jonqsu l-għerf, ħa jissupplikah mingħand Alla, li jagħti ’l kulħadd ġenerożament u bla ma jirrimprovera, u jkun mogħti lilu. Imma jmissu jissupplika bil-fidi bla ma jiddubita xejn, għax min jiddubita donnu ħalla tal-baħar, misjuqa u mxewlħa mir-riħ.” (Ġakbu 1:2-6).
Bħalma l-bidwi jieħu ħsieb l-għoros (xitel ċkejkna), u jipproteġihom bl-ilqugħ biex ma jitqaċċtux, iżda meta jrabbu l-għeruq sew u jissodaw, ineħħilhom l-ilqugħ u jħalli jfendu għall-irjieħ u l-maltemp, hekk Alla jgħasses lil uliedu b’sigurezza ta’ konforti ġewwiena, iżda mbagħad, kif jarmaw jikbru, jesponihom għall-irwiefen, għax ikunu jifilħu jġarrbuhom. Mela ħa ma naħsbux illi nkunu aħjar jekk ninsabu ħielsa minn kull saram u tfixkil. Jekk l-andament hu relattivament lixx, dan probabbilment ifisser li Missierna għadu qed jarana immaturi u debboli.
Mill-bqija, il-prosperità għandha l-ażżard tagħha. Rari ssib raġel mixħut biex isir sinjur u fl-istess ħin għaddej ’il quddiem fil-fidi. Huma l-foqra li normalment jirċievu u jsegwu l-Evanġelju. Kristu jippronunzja barka kemm fuq il-foqra fl-ispirtu kif ukoll fuq il-foqra materjalment. Jekk tabilħaqq napprezzaw iż-żelu tagħna fil-fidi, ħa ngħassu kontra t-tentazzjoni li nsiru sinjuri; aspirazzjonijiet ambizzjużi jistgħu faċilment iqabbduna t-triq tar-rigressjoni u ċaħda. Jiġrilna bħal meta Pietru kien fil-bitħa waqt il-ġuri ta’ Sidu: hu u jsaħħan idejh, berred qalbu.
“Il-prosperità,” jgħid il-Puritan William Gurnall, “mhi ħabiba xejn ma’ memorja santifikata, u għaldaqstant aħna avvertiti, meta nkunu mimlijin, li ma mmorrux ninsew lil Alla. Noè, li ra d-dinja kollha mgħarrqa bl-ilma, malli żbarka sikur fuq l-art, u beda jgawdi l-abbondanza, nesa ’l Alla, u għarraq lilu nnifsu fl-inbid.”
Fejn elf huma distrutti bid-diżapprovazzjoni tad-dinja, għaxart elef jinqerdu biż-żegħil tagħha. Bħas-sireni, id-dinja tkantalna, imbagħad tgħarraqna. David seta’ jissaporti l-persekuzzjoni bla tgemgim, iżda meta daħal fil-fażi tas-suċċes u l-prosperità ma setax idawwar ħarstu mill-frugħa.
Talba: “Abba Missierna, int waħdek għaref; f’idek iżżomm in-nifs u d-destin ta’ kull laħam. Nitolbuk, f’ġieħ Ibnek Ġesù, sabiex ma tesponiniex għall-perikli li bihom nistgħu naqgħu u noffenduk. Frattant, jekk jogħġbok tgħaddina minnhom, għall-iskopijiet sapjenti tiegħek, issapportjana u kun magħna kull mument, biex noħorġu msoffija bħad-deheb. F’ġieħ Ibnek Ġesù. Ammen.”
Comments