“Anzi, aktar minn hekk, nikkonsidra saħansitra kollox bħala telf minħabba l-valur wisq aktar superjuri li nkun naf lil Kristu Ġesù Sidi. Minħabba fih irrinunzjajt il-ħwejeġ kollha, u nikkonsidrahom biss żibel sabiex niggwadanja ’l Kristu u ninstab fih, mhux li għandi l-ġustizzja personali tiegħi, dik derivata mil-liġi, iżda dik li tiġi permezz tal-fidi fi Kristu – il-ġustizzja mingħand Alla bbażata fuq il-fidi - ħalli nkun naf lil Kristu u s-setgħa tar-resurrezzjoni tiegħu u x-xirka tas-sofferenzi tiegħu, billi nkun ikkonformat ma’ mewtu, sabiex b’xi mod nilħaq ir-resurrezzjoni mill-imwiet” (Filippin 3:8-11).
Nistgħu nkejlu l-avvanz jew ir-rigress tagħna fil-grazzja skont kemm ħsibijietna u l-meditazzjoni tagħna huma fuq Kristu, u fuq il-glorja ta’ saltnatu, u fuq imħabbtu. O li nkunu nafu aktar u aktar l-imħabba tiegħu li tisboq kull dehen, u nimtlew bil-milja kollha t’Alla!
U meta nkantawlu t-tifħir tagħna, dan mhuwiex eżerċizzju battal. Il-kant, offrut b’atteġġjament spiritwali u b’fehma tajba, iżomm il-qalb fit-tul fuq is-suġġett. It-talb u s-smigħ tal-prietka sikwit jgħaddu minn sentenza għall-oħra; fil-kant il-moħħ jomgħod u jtiegħem fit-tul, jixtarr x’qed jitgħanna, u l-benefiċċju hu ogħla milli nimmaġinaw.
Kanta waħdek u ma’ sħabek. Itlob waħdek u ma’ sħabek. L-eżerċizzju tiegħek innifsek fis-solitudni huwa prova probabbli tar-rettitudni tiegħek. Fil-kumpanija sikwit niskansaw il-ħażen minħabba l-brilji tal-biża’ u l-mistħija, u provokati nagħmlu s-sewwa bl-ixpruni dehbija tal-kommendazzjoni jew profitt. Iżda fis-solitudni m’għandna ebda rażan għal-leblieba tagħna, u m’għandna xejn fil-mogħdija tal-qdusija biex tinkuraġġixxi l-progress tagħna. Il-linjamenti għarwiena u l-ħsibijiet naturali tar-ruħ huma magħrufa u mkejla l-aħjar fis-sigriet.
Talba: “Linja fuq linja, sentenza fuq sentenza, għallimna Kelmtek, o Missier. Sawwar minna nies li kapaċi mbagħad nammonixxu lil xulxin b’kull għerf, filli nkantawlek salmi u innijiet, b’rikonoxxenza fi qlubna lilek. Sew jekk bil-kelma jew bl-att, niġu quddiemek bil-qima tagħna f’isem Kristu, il-Medjatur li int ħtart bejnietna.”
Comments