“Meta trejqu, Ġesù qal lil Xmun Pietru, ‘Xmun bin Ġwanni, verament tħobbni iżjed minn dawn?’ ‘Iva, ja Sid,’ qallu, ‘int taf illi nħobbok.’ Ġesù qallu, ‘Agħlef il-ħrief tiegħi.’ Reġa’ staqsieh it-tieni darba, “Xmun bin Ġwanni, verament tħobbni?’ Wieġbu, ‘Iva, ja Sid, int taf illi nħobbok.’ Qallu Ġesù, ‘Irgħa n-nagħaġ tiegħi.’ Staqsih it-tielet darba, ‘Xmun bin Ġwanni, tħobbni?’ Pietru tnikket għax qallu t-tielet darba, ‘Tħobbni?’ Qallu, ‘Ja Sid, int taf kollox; int taf illi nħobbok.’ Ġesù qallu, ‘Agħlef in-nagħaġ tiegħi’” (Ġwanni 21:15-17).
Aħjar nagħmel żball onest milli ma nagħmel xejn għax nibża’ li nagħmel żball. Ordinarjament ikolli nitqanna bil-konsegwenzi umani u materjali tad-deċiżjonijiet żmerċi illi nieħu. Sikwit inġib in-niket fuqi nnifsi minħabba li riġlejja jidħlu fi sqaqien.
B’daqshekk ninsab f’kumpanija tajba. Nies kbar ikkommettew żbalji gravi inkwantu r-rieda t’Alla għalihom. David bi stinazzjoni għamel iċ-ċensiment tal-poplu. Pietru bbojkottja lill-fidili Ġentili. Mosè qatel lill-Eġizzjan biex mingħalih ifiehem lill-Ebrej illi kien hu l-feddej tagħhom. Ġakobb għadda ’l missieru stess minn għajn il-labra. Nistgħu nibqgħu nżidu mal-lista.
Ħadd minnhom ma waqa’ hekk li baqa’ xkanat mal-art, jew sar għal dejjem diżapprovat. Ilkoll irċevew il-maħfra u ġew restawriti. Difatti l-vera qaddisin hekk jgħaddu minn jum għal jum – b’maħfra kostanti. Meta ma nifhimx x’irid preċiżament Alla minni jkun wisq inqas gravi milli nifhimha u nibqa’ ma nagħmilhiex.
Jekk Ġesù laqa’ lura lil Pietru wara ċ-ċaħda tripla tiegħu, jilqa’ lili. Jekk il-Mulej għannaq miegħu għal darb’ oħra lil David wara l-adulterju u wara li Urija safa eliminat fuq l-ordni tiegħu, jilqa’ lili. Jekk nidneb kontrih seba’ darbiet f’jum, seba’ darbiet jilqagħni lura. U bl-istess spirtu jikkmandani nagħmel l-istess ma’ ħaddieħor.
Talba: “Alla tas-sema, int qaddis, qaddis, qaddis! Kieku kellek iżżommilna kont ta’ ħtijietna ħadd minna ma jieqaf quddiemek. Ilkoll nisfaw taħt kundanna u piena ġusta. Iżda mingħandek tiġina l-maħfra, bil-fidwa maħduma minn Ibnek Ġesù, biex hekk inqimuk b’kull reverenza u nimxu quddiemek b’umiltà u rikonoxximent. Ammen.”
Comments