“Il-ħaqq tiegħek hu bħal muntanja ta’ Alla; il-ġudizzji tiegħek bħal abbiss kbir. Mulej, int tgħin lill-bnedmin u ’ll-bhejjem. Kemm hi għażiża t-tjieba tiegħek, o Alla! Għalhekk ulied il-bnedmin iqiegħdu t-tama tagħhom taħt id-dell ta’ ġwinħajk. Bil-ġid ta’ darek jixbgħu, u int tisqihom mix-xmara tal-hena tiegħek. Għax fik hemm l-għajn tal-ħajja; f’dawlek naraw id-dawl” (Salmi 36:6-9).
Mhux wieħed jew tnejn issibilhom storja speċjali x’jirrakkontaw. Ħa nsejhulha, “L-inkontru tiegħi m’Alla.” Jidħlu fid-dettalji u jsostnu illi ħassewh lil Alla. Avolja mhumiex Kristjani, iltaqgħu mal-myterium tremendum. L-esperjenza tagħhom imbagħad jużawha bħala prova li la għandhom bżonn il-Bibbja u wisq inqas id-dommi u l-formoli ekkleżjastiċi dwar Alla. Ma jaraw ebda valur, ngħidu aħna, fil-Kredu tal-Appostli. Ladarba ltaqgħu mal-ħaġa reali, dawn l-artikli mill-antik jidhru ġugarelli, oġġetti pedantiċi għalihom.
Meta wieħed minn fuq il-plajja jkun osserva b’kemm tagħtih il-vista fuq l-Antlantiku, jekk imbagħad iħares lejn mappa tal-istess oċean, ikun ukoll qed idur minn ħaġa reali għal ħaġa inqas reali. Ikun dar minn mewġ veru għal folja kkulurita. Issa hawn hu l-punt. Nammettu, il-mappa hi biss karta mlewna, iżda hi bbażata fuq l-esperjenza ta’ eluf ta’ nies, x’sabu meta baħħru fuq l-Atlantiku. Għandha warajha toqol ta’ tiġrib daqstant reali bħall-epserjenza individwali minn fuq ix-xatt.
Id-differenza tinsab hawn: tiegħek hi ħarsa waħda u iżolata, mentri l-mappa tiffittja dawk l-esperjenza kollha f’daqqa. Jerġa’, jekk tixtieq tmur x’imkien, il-mappa hi assolutament essenzjali. Dment li interessat biss b’passiġġati mal-kosta, il-ħars tiegħu hu wisq iżjed sodisfaċenti milli tikkonsulta l-atlas. Imma l-mappa hi wisq iżjed utli minn passiġġati fuq il-kosta jekk biħsiebek tbaħħar lejn l-Amerika.
It-teoloġija bħal mappa. Jekk tieqaf b’sempliċi tagħlim u katekeżi dwar id-dottrini Kristjani, il-mappa hi bil-qabda inqas interessanti minn laqgħa diretta m’Alla, jew esperjenza ħajja miegħu. Id-dottrini mhumiex Alla: huma speċi ta’ mappa – juruk fejn sejjer u kif tasal. Jekk ma nisimgħux mill-Bibbja, ma jfissirx illi ma jkollniex ideat dwar Alla. Ifisser illi tiġi invażat b’salt ideat żbaljati dwar Alla, ereżiji illi lanqas biss tinduna li huma ereżiji. Jekk tibqa’ injorant dwar il-kontenut tal-Bibbja biex issegwi l-ideat popolari u sekulari tal-moderniżmu tkun qed issofri retrogressjoni – bħal meta llum temmen illi d-dinja hi ċatta.
Talba: “O Alla tal-eżerċti, int għarraft ismek lin-nies minn kull ġenerazzjoni, u dawn jaqblu bejniethom illi inti spirtu infinit, etern, ma tinbidilx fl-enti tiegħek, fl-għerf, il-qawwa, qdusija, ġustizzja, tjieba u verità. Bl-umiltà u fl-għaqda magħhom jien nagħtik qima, ġieħ u glorja, issa u għal dejjem. F’isem Ibnek Ġesù. Ammen.”
Comments