“Biss, jiġri x’jiġri, ġibu rwieħkom denjament tal-evanġelju ta’ Kristu, sabiex sew jekk niġi u narakom jew nibqa’ assenti, nisma’ dwarkom illi tieqfu sħiħ fi spirtu wieħed, b’fehma waħda tikkumbattu flimkien għall-fidi tal-evanġelju, bla ma tkunu mbeżża’ f’xejn mill-opponenti tagħkom. Dan hu għalihom turija ta’ distruzzjoni, imma għalikom ta’ salvazzjoni – u dan mingħand Alla. Għax lilkom hu mogħti b’xejn, għal Kristu, mhux biss li temmnu fih, iżda wkoll li tbatu għalih, billi ġġarrbu l-istess sargħa li rajtu fija, u issa tisimgħu li għad għandi” (Filippin 1:27-30).
Il-fidi hi rikjesta minna, u fl-istess ħin il-fidi hi għotja t’Alla, l-istess bħalma Alla kmanda lil-Lhud biex jagħmlu ċ-ċirkonċiżjoni f’qalbhom, u peress li kienet ħaġa impossibbli għalihom, għamilhielhom hu. Aħna nemmnu, tabilħaqq, imma mhux mingħajr l-abbiltà mogħtija lilna minn Alla, abbiltà li qalgħahielna Ibnu bl-Ispirtu tiegħu.
Dil-fidi li dwarha qed nitkellmu mhijiex sentiment; aktarx, tinvolvi l-fehma u fuq kollox ir-rieda. Il-maqgħad tal-fidi hi l-fehma, kif ukoll il-volontà umana. Għandha għajn biex tara lil Kristu, kif ukoll ġwienaħ biex ittir għandu. Għalkemm kultant jista’ jkollha id titriegħed, ma jistax ikollha id iċċongata, għax trid titmattar, tiġġebbed biex taqbad lil Kristu. Jekk mhix vitali mhi xejn ħlief xow bla sugu.
Nieħdu lil Ġuda bħala illustrazzjoni. Ġuda kien midħla tal-Iskrittura, u indubjament ta l-kunsens tiegħu għall-verità fiha, u difatti għamel żmien predikatur tal-Vanġelu, iżda qatt u qatt ma kellu l-iċken għabra ta’ fidi salvivika f’ruħu. Imqar l-imgħallem ta’ Ġuda, ix-xitan innifsu, jaqbel mal-verità mħaddna fil-Bibbja, u ma jissograx jinnegaha direttament. Meta ġarrab lil Ġesù ma ddisputiex kontra l-Iskrittura imma mill-Iskrittura. Silet il-vleġeġ mill-ħorġ bibliku.
Minn hawn nintebħu illi wieħed jista’ faċilment jaqbel mal-verità biblika; dan hu biss att tal-fehma. Ir-reprobati u d-demonji jeżerċitaw dit-tip ta’ fidi, bla ma tiswielhom xejn. Il-fidi li tiġġustifika hi essenzjalment differenti, għax għalkemm tifhem u tħaddan ċerti fatti (bħax-xitan illi jemmen li Alla hu wieħed!) tippossiedi wkoll ir-rieda. Allura hi fidi li tieħu azzjoni, ċoè tafda fi Kristu, u konsegwentament ukoll tiffjorixxi fl-imħabba. Huwa minħabba f’hekk li l-Bibbja tisħaq li l-fidi trid tkun mill-qalb, mill-bniedem sħiħ, fis-sinċerità.
Talba: “Inħobbok, o Mulejja, int il-qawwa tiegħi. Int sirt il-blata u l-fortizza tiegħi. Inħares lejk bħala l-ħellies tiegħi mill-qabar, mill-Infern u, l-agħar, mid-dnub. Aħbini fik; kun it-tarka u d-difiża kollha tiegħi. Jien niġri lejk, għax int it-torri għoli tiegħi. Seddaqli l-fiduċja tiegħi fik, biex nistrieħ u nitpaxxa bik, u nżommok bħala l-bidu u t-tmiem tal-eżistenza tiegħi.”
Comments