“Għajtu għajta ta’ ferħ lill-Mulej, intom nies kollha tal-art! Aqdu lill-Mulej bil-ferħ; ejjew quddiemu bil-għana ferrieħi. Kunu afu li l-Mulej hu Alla; hu li għamilna, u mhux aħna lilna nfusna; aħna l-poplu tiegħu u nagħaġ tal-mergħa tiegħu. Idħlu minn bwiebu b’radd il-ħajr, u fil-btieħi tiegħu bit-tifħir; faħħruh, u bierku l-isem tiegħu. Għax twajjeb il-Mulej; għal dejjem tjubitu; u l-fedeltà tiegħu ddum minn nisel għal nisel!” (Salmi 100:1-5).
Alla, unikament glorjuż, hu muri bħala l-Ħallieq u Feddej, il-benemertu tal-qima esklussiva tagħna. L-adorazzjoni tiegħu jmissha tkun universali, u hekk għad tkun! L-artijiet kollha għad jipparteċipaw fiha.
Qima aċċettabbli hi ġubilanti u ferrieħa. Alla mhux sultan despotiku li jisforza lil niesu jservuh. Servizz motivat mill-imħabba huwa r-risponsorjal grat għall-grazzja t’Alla. Irridu nistmawh bħala favur meta nkunu mdaħħla fis-servizz tas-Sultan, u nirringrazzjawh talli għandna l-libertà ta’ dħul quddiemu, li għandna ordinanzi mwaqqfa, u opportunità kontinwa sabiex naqduh f’dawn l-ordinanzi.
Li tqim ’l Alla b’nofs qalb, jew bix-xofftejn biss, qajla hu differenti minn indifferenza. Tingaġġa f’qima formali hija alternattiva bażwija għal dawk li ma jridux iqimu. Hekk jew hekk, meta nqimuh b’nofs qalb, jimplika li x-xitan għandu klejm fuq in-nofs l-ieħor. U x-xitan jikkuntenta bit-tali kompromess, għax hu bħal dik il-mara quddiem Salamun, li t-tarbija ma kinitx tagħha; ix-xitan ma jimportahx jekk qalbek tinqasam biċċtejn.
Il-kif u x’fatta se nersqu quddiem il-Mulej hu indikat: “Aqdu lill-Mulej bil-ferħ; ejjew quddiemu bl-għana ferrieħi.” X’hemm li jesprimi l-ferħ u l-hena aktar mill-għana u l-mużika? Jekk imissna nkantaw, irridu nitgħallmu nkantaw? Altrimenti nagħmlu biss kakofonija, u niddisturbaw id-devozzjoni ta’ sħabna fil-ġemgħa. Ma naffordjawx illi l-mużika fil-knisja tkun trivjali, jew inkella toħnoq il-kontenut tal-innijiet. L-aħjar mużika sempliċi, biex il-kongregazzjoni kollha tipparteċipa.
Dwar mużika sagra Griżostmu jgħid: “Xejn ma jerfa’ ’l fuq lir-ruħ, xejn ma jħollha mill-ktajjen tal-ġisem, aħjar minnha.” Wistin ħallielna dal-kumment, mingħalija meta pparteċipa fil-liturġija f’Milan, qabel ma kkonverta: “Kemm kont nasal biex nibki liberament b’dawk l-innijiet u għanjiet spiritwali, trasportat bil-leħen tal-kongregazzjoni hija u tkanta bil-ħlewwa; il-melodija ta’ leħinha kienet timlili widinti, u l-verità ċelesti kienet titferra’ f’qalbi. Imbagħad il-fjamma tad-devozzjoni sagra kienet titkebbes f’ruħi, u gelgul ta’ dmugħ kien inixxi minn għajnejja...” Ħalli l-mużika sagra tkun koltivata u mħaddma bl-abbondanza.
Talba: “O Alla kbir u setgħani, int tagħmel l-għeġubijiet. Ngħannulek għanja ġdida, El Eljon! Bħala ġemgħa ta’ fidili nfaħħruk. Ikkostitwejtna bħala Iżrael il-ġdid tiegħek, nisel Abraħam u werrieta skont il-wegħda. Erfajtilna qlubna lejk! Ħa nagħtuk ġieħ u glorja, u magħna jingħaqad kulma jieħu n-nifs, bid-daqq tal-kitarri u l-pjanu, b’armonija ferrieħa. Ħalleluja! Ammen.”
Comments