“Issa kien hemm ċertu wieħed marid, Lażżru minn Betanja, ir-raħal ta’ Marija u oħtha Marta. Kienet din Marija li dilket lis-Sid bil-fwieħa u xxottatlu saqajh b’xagħarha, li ħuha Lażżru kien marid. Għalhekk l-aħwa bagħtu għandu jgħidulu, ‘Ja Sid, dak li tħobb int jinsab marid.’ Imma malli sema’ hekk, Ġesù qal, ‘Dil-marda mhix għall-mewt, iżda għall-glorja t’Alla, sabiex biha jkun igglorifikat Bin Alla.’ Ġesù kien iħobb lil Marta u ’l oħtha u ’l Lażżru. Għalhekk meta sema’ illi kien marid, imbagħad baqa’ jumejn oħra fil-post fejn kien” (Ġwanni 11:1-6).
Sikwit jiġri illi ċerti okkorrenzi jintervienu f’ħajjitna b’tali mod u manjiera illi donnhom jikkontradixxu l-verità t’Alla. Apparentement imorru kontra l-wegħda divina. Għalhekk, jekk niġġudikaw mill-ħars u d-dehra, inkunu spiss ingannati. Kelmet Alla waħidha hi r-regola tal-fidi. Kulma ddikjara hu ċertament jiġri, avolja qisu jeħodha kontra r-raġuni karnali.
Hekk Sidna jgħid dwar Lażżru, “Dil-marda mhix għall-mewt.” Frattant aktar tard id-dixxipli tiegħu jinformawh fiċ-ċar, “Lażżru miet.” Ġesù skopra illi kien ilu erbat ijiem fil-qabar meta wasal hu.
Imma s-Sid, li għandu l-qawwa fuq il-mewt u l-qabar, kien jaf bl-intenzjoni fih innifsu biex iqajmu mill-mewt, għall-glorja tal-Missier kif ukoll biex isebbaħ lilu nnifsu. Minħabba f’hekk ġie fid-dinja. Għaldaqstant, fil-ħajja u bil-mewt ta’ Kristu, il-glorja timmultiplika lil “Alla fl-ogħla, u paċi fl-art, rieda tajba lill-bnedmin.”
Ġesù kien iħobbu lil Lażżru? L-għajnejn kumpassjonali tiegħu xerrdu dmugħ ta’ affezzjoni fuq il-qabar ta’ ħabibu. U liema kumpanija innumerabbli ta’ midinbin imsejkna raw għajnejh! Agħar minn Lażżru, kienu mhux biss lil hinn minn kull tama, iżda attwalment “mejtin fit-trasgressjonijiet u fid-dnubiet.” U dwarhom jgħid ukoll, “Dil-marda mhix għall-mewt.” Il-mewt eterna mhix se tiddomina fuqhom. Għall-kuntrarju, irid li Missieru jkun glorifikat, u hu nnifsu glorifikat, filli jgħajjixhom u jqajjimhom bħala l-maħturin u l-maħbubin t’Alla, ilkoll kemm huma l-membri ta’ ġismu.
Talba: “Inroddlok ħajr, Mulej, talli għażiltni mill-eternità, u fiż-żmien sejjaħtli bil-grazzja tiegħek. Ħajtek hi ħajti, int fija u jiena fik, għax jien ma ngħixx iżjed, iżda int tgħix fija, u l-ħajja preżenti tiegħi ngħixha bil-fidi fik. Agħmel illi din il-verità sublimi tintwera fil-konkret bil-mod kif nimxi minn jum għall-ieħor. Ammen.”
Comments