“Tkunux idolatri, bħal xi wħud minnhom; bħalma hu miktub: ‘In-nies poġġew jieklu u jixorbu, u qamu jilagħbu.’ M’għandniex niffornikaw, bħalma xi wħud minnhom iffornikaw, u mietu tlieta u għoxrin elf f’jum wieħed. M’għandniex inġarrbu lis-Sid, bħalma xi wħud minnhom ġarrbuh, u kienu meqrudin mis-serpenti; lanqas tgemgmu, kif xi wħud minnhom gemgmu, u kienu meqrudin mill-anġlu qerried. Issa dawn il-ħwejjeġ ġraw lil dawk in-nies bħala eżempji, u nkitbu bħala ammoniment għalina, li fuqna wasal it-twettiq taż-żminijiet. Għalhekk min jidhirlu li jinsab wieqaf fis-sod għandu joqgħod attent li ma jaqax! Ebda tiġrib ma qabadkom ħlief dak li hu komuni għall-umanità. Però Alla hu fidil, u mhux se jħallikom tkunu mġarrbin lil hinn milli kapaċi tifilħu, iżda mat-tiġrib jipprovdi l-ħruġ ukoll, ħalli tkunu tistgħu tissaportuh” (1 Korintin 10:7-13).
Alla jippermetti li niesu jkunu mġarrba. Iħalli lill-avversarju malinn tagħna biex jaħbatna, avolja aħna l-ulied għeżież tiegħu. Għaliex jadotta dal-metodu? Ewwilla mhux biex iqawwini fil-grazzji spiritwali tagħna? Ewwilla mhux biex jikkonfermana aktar fl-assigurazzjoni ta’ mħabbtu li biha pjanalna u esegwixxi s-salvazzjoni tagħna?
Belt li darba sfat assedjata imma baqgħet ma ċedietx, aktar ’il quddiem tkun kapaċi żżomm sħiħ jekk tkun assaltata minn xi periklu simili, għax fil-frattemp iseddqulha l-balwardi u l-fortizzi tagħha jerġa’ aktar minn qabel. B’mod simili, dawk assaltati mit-Tentatur joqogħdu aktar attenti u jarmaw lilhom infushom kontrih billi jxiddu l-armatura sħiħa provduta lilhom skont il-grazzja, biex ma jingħelbux minnu. Ħadd mhu aktar kwalifikat biex jagħraf it-tattiċi ħajjiena tax-xitan minn dak li jkun ilu jitħarreġ fil-kulleġġ tat-tentazzjoni. Hekk jaħseb is-Sid f’għerfu.
Ninnotaw kif Alla kellu Iben wieħed mingħajr korruzzjoni, imma m’għandu ebda iben mingħajr tentazzjoni. B’daqshekk ma nikkonkludux li nistgħu ndaħħlu l-lifgħa fil-komma, jew inressqu n-nar lejn ħobbna. Hemm differenza kbira bejn taqa’ fit-tentazzjoni, u tiġri lejn it-tentazzjoni. Tiltaqa’ mat-tiġrib imissu jirriżultalek għall-avvanz spiritwali. Tfittex it-tiġrib hu ġenn, għax l-Imgħallem mhux hekk għallimna nitolbu. Li tkun trid it-tentazzjoni hi l-akbar tentazzjoni fosthom kollha. Jekk minn fuq il-gverta taqa’ l-baħar aċċidentalment, abbli tirċievi l-ajjut immedjat, imma jekk b’disprament tinxteħet apposta l-baħar tkun ħati ta’ mewtek stess.
Mela ħa nirrealizzaw illi bix-xieraq irridu nkunu kostantement imħejjija: “Ibqgħu għassu u itolbu sabiex ma tidħlux fit-tiġrib. L-ispirtu jrid, imma l-ġisem dgħajjef” (Mattew 26:41). Mill-banda l-oħra nagħrfu wkoll illi ma nistgħux naslu għall-vittorja fejn ma rfisniex l-għalqa tal-kumbatt.
Is-sabiħa hi din: il-vittorja ma tiddependix minna, imma minn Kristu, il-Kaptan tal-eżerċti tal-Mulej, li ħadha fuqu nnifsu biex jikkonkwista għalina (fuq is-salib), u jikkonkwista fina (fl-andament ta’ ħajjitna, bl-Ispirtu tiegħu). Jekk emanċipana mill-kundanna, mhux sejjer ma jilliberaniex mid-dominanza tal-ħażen?
Ejjew, mela, ma niffissawx daqstant fuq l-għedewwa. Aktarx, ħa nkunu kkonċentrati u nitgħaxxqu fl-Irxoxtat, l-Imħallef u r-Rajjes tagħna. Nagħtu inqas kas il-minaċċji tan-nemik, u aktar kas il-wegħdi tal-Imgħallem tagħna.
Talba: “Missier għaref u twajjeb tagħna, iddaħħalniex fit-tiġrib, għax aħna dgħajfa fina nfusna u naqgħu faċilment. Sostnina bl-Ispirtu tiegħek; ħa nkunu mimlijin bih biex hekk ninħelsu mill-istrataġemmi u t-trapppoli tal-Ħażin. Agħmilna aktar reżistenti biex ma naqgħux mal-iċken pressjoni. Ammen.”
Comments