“Titqarrqux: ma nistgħux immasħru ’l Alla, għax kwalunkwe ħaġa li l-bniedem jiżra’, dik ukoll se jaħsad. Min jiżra’ biex jogħġob in-natura midinba tiegħu nnifsu, minn dik in-natura se jaħsad il-korruzzjoni; min jiżra’ għall-Ispirtu mill-Ispirtu se jaħsad il-ħajja eterna. Ħa ma nintelqux nagħmlu t-tajjeb, għax fi żmien imwaqqat se naħsdu jekk ma nċedux. Hekk mela, dment li għandna l-opportunità, ħa nagħmlu l-ġid ma’ kulħadd, speċjalment ma’ dawk ta’ dar il-fidi” (Galatin 6:7-10).
Iż-żriegħ donnu mhux idea tajba, għax tkun qed tarmi qamħ tajjeb fl-art biex qatt ma tarah iżjed. Tiżra’ għall-Ispirtu wkoll jidher xogħol inċert u tal-immaġinazzjoni; għax inċaħħdu lilna nfusna, u apparentement ma nieħdu xejn lura. Madankollu jekk niżirgħu fl-Ispirtu billi noqogħdu attenti li ngħixu għal Alla, infittxu nobdu r-rieda tiegħu, u nagħmlu ħilitna biex nippromwovu l-unur tiegħu, ma niżirgħux għalxejn.
Il-premju tagħna jkun il-ħajja, saħansitra ħajja eterna. Din ingawduha minn issa appena niddaħħlu fl-għarfien t’Alla permezz ta’ Ibnu, u nimxu miegħu f’komunjoni. Dil-ħajja tnixxi u titwessa’ iżjed u iżjed bħal xmara li dejjem tikber, sakemm twassalna fl-oċean ta’ tgawdija infinita, fejn il-ħajja t’Alla hi tagħna għal dejjem ta’ dejjem.
Ħa ma niżirgħux illum għal ġisimna, għax inkella l-ħsad ikun taħsir u ntiena, peress li l-ġisem korruzzjoni biss jirrendi. B’rebħa qaddisa fuqna nfusna ejjew ngħixu b’intenzjoni għolja, pura u spiritwali, u nfittxu nonoraw lill-Mulej Alla tagħna billi nċedu għall-Ispirtu grazzjuż tiegħu. Xi ħsad ikun dak meta naħsdu l-ħajja eterna! X’qatet ta’ tgawdija dejjiema niġbru fil-maħżen tagħna! X’festa jkun fih dak il-ħsad!
Talba: “Mulej, aħna rċevejna b’xejn; agħtina l-kuraġġ nagħtu b’xejn. Sawwarna kulma jmur fi strumenti qaddisa u utli tiegħek. Agħmilna ħassada kbar billi minn issa niżirgħu l-Kelma tas-sewwa tiegħek, b’kull perseveranza, b’dipendenza fuqek biex tkabbar, għall-glorja ta’ ismek stess. Ammen.”
Comments