“Jien se nirrikjesta lill-Missier, u jagħtikom Paraklitu ieħor, sabiex ikun magħkom għal dejjem. Qed ngħid għall-Ispirtu tal-verità, li d-dinja ma tistax tirċevih, għax la tarah u lanqas tafu. Iżda intom tafuh, għax jgħammar magħkom u se jkun fikom. M’inix se nħallikom bħall-orfni; se niġi għandkom. Daqsxejn ieħor u d-dinja ma taranix iżjed, imma intom għad tarawni. Għax jien ngħix, se tgħixu intom ukoll. Għidtilkom dan kollu meta għadni magħkom. Imma l-Paraklitu, l-Ispirtu s-Santu, li l-Missier se jibgħat f’ismi, hu se jgħallimkom kollox u jfakkarkom kulma għidtilkom jien” (Ġwanni 14:16-19,25-26).
Intellettwalment, il-bniedem naturali jista’ jottieni bosta veritajiet teoloġiċi, imma Alla jrid ikun biex jgħallimna u nagħrfu l-misterji tal-vanġelu b’manjiera spiritwali. Wieħed jista’ jara l-figuri fuq il-meridjana, iżda ma jsirx jaf x’ħin hu jekk ix-xemx ma tiddix. B’mod simili, nistgħu nsiru midħla akkademikament ma’ diversi veritajiet fil-Bibbja, bla ma nkunu nafuhom salvivikament, jekk l-Ispirtu s-Santu ma jiddix fuq ruħna. Għax jeħtiġilna mhux biss ninformaw lil moħħna, iżda r-rieda tagħna trid tkun iddrittata u mħajra tissottometti għal kulma hu miktub.
Għaldaqstant, meta ngħidu li l-Ispirtu jrid ikun biex jinterpretalna Kelmtu stess, qegħdin nirrikonoxxu l-ministeru indispensabbli tiegħu biex naslu f’relazzjoni vitali m’Alla. Meta wieħed hu mgħallem minn Alla, allura Kelmtu japplikaha għalih innifsu. Hekk biss tagħmillu l-ġid. Issa aħna lkoll ninsabu dipendenti fuq il-Paraklitu, l-Ispirtu tal-verità, biex jiftħilna l-bieb tal-verità. Min m’għandux il-muftieħ korrett ma jirnexxilux jidħol id-dar daqs dak li m’għandux muftieħ. Anzi, f’ċertu sens, jinsab f’qagħda agħar, għax min m’għandux muftieħ jista’ jitlob għall-għajnuna, iħabbat il-bieb, jgħajjat lil min jgħammar ġewwa, biex jiftaħlu, mentri min ikun qed jafda fil-muftieħ falz jaħli ħinu jteftef bil-muftieħ bla ma jasal imkien.
Ninsabu dipendenti fuq l-Għalliem smewwieti. B’daqshekk ma ngħatatilna ebda skuża għall-għażż. Għandna eżortazzjonijiet għall-istudju personali. “Ħabrek biex tidher quddiem Alla bħala wieħed ipprovat,” jgħid l-appostlu Pawlu lill-kollega tiegħu, “ħaddiem li m’għandux mniex jistħi, li jqassam bir-reqqa l-kelma t’Alla” (2 Timotju 2:15). Aktar kmieni jappellalu, “Irrifletti fuq dak li qed ngħid, għax is-Sid se jagħtik il-perċezzjoni f’kollox” (v.7). Ħabrek, immedita, agħmel ħiltek, kun responsabbli! Dan kollu inkluż fl-istudju serju tal-Iskrittura. Mhuwiex ix-xogħol tal-Ispirtu li jfornik bit-tifsira tal-Iskrittura, u jagħtik it-tagħrif tat-teoloġija, mingħajr studju, meditazzjoni u tfittix kif tista’ tapplikaha personalment. L-Ispirtu jbierek l-istudju tiegħek, u hekk jarrikkik fit-tagħrif. Utilizzat tajjeb, it-tagħrif ifornik bil-għerf. Bl-għerf timxi fil-mogħdijiet tas-sewwa. Jekk tirrofta l-istudju, bi skuża tas-suffiċjenza tal-Ispirtu, tkun qed tirrofta l-Iskrittura nfisha.
Fattur ieħor essenzjali: ma tistax tippretendi li l-Ispirtu jgħallmek jekk m’għamilt xejn b’dak li diġà tak, ċoè, jekk qed tirreżisti l-ministeru tiegħu f’ħajtek. In-nar jintefa billi tferra’ l-ilma fuqu jew billi titfalux iżjed ħatab. Hekk l-Ispirtu jitberred jekk tgħix fid-dnub. Tkun qisek qed tixħet l-ilma fuq ħuġġieġa. L-istess jiġri jekk ma ttejjibx id-doni u l-grazzji tiegħek. Tkun qisek waqaft milli twaddab il-kebs fil-fuklar.
Talba: “Spirtu Qaddis, kun int il-Gwida tiegħi, il-Paraklitu sabiex ikolli sostenn, faraġ u inkuraġġiment, sabiex nitqawwa fil-grazzja u navvanza fil-produzzjoni tal-frott illi jigglorifika lil Missieri fis-smewwiet. Urini kemm neħtieġ niddependi fuqek biex mhux biss nifhem il-verità iżda wkoll nimxi fiha. Ammen.”
Comments