“L-intenzjoni tiegħu kienet sabiex issa, permezz tal-knisja, l-għerf wisq varjat t’Alla jkun mgħarraf lill-ħakkiema u l-awtoritajiet fl-imkejjen smewwitin, skont l-għan etern li attwa fi Kristu Ġesù Sidna. Fih għandna l-kuraġġ u aċċess bil-kunfidenza permezz tal-fidi fih. Għaldaqstant nissupplikakom biex ma tiskuraġġux irwieħkom minħabba t-tribulazzjonijiet tiegħi għalikom, li huma l-glorja tagħkom” (Efesin 3:10-13).
Xi wħud jikkalkolaw li l-kuraġġ huwa nofs triq bejn it-timidità u l-istupidaġni. Jgħidu wkoll li tista’ tkun galanti daqs għaxra, u b’sengħa evidenti, imma jekk ma jkollokx xorti tajba ftit jiswewlek. Possibbilment, imma l-kwistjoni ifnad minn hekk.
In-nuqqas ta’ kuraġġ jintwera l-aktar meta taf x’inhu s-sewwa u tibqa’ ma twettqux. Essenzjalment jikkonsisti filli tara l-periklu tal-ħażen, il-minaċċja tal-inikwità, u tegħlibhom, mhux iddawwar ħarstek band’ oħra. Il-kuraġġ fil-periklu hu nofs il-battalja.
L-ikbar test għall-kuraġġ tgħaddi minnu meta tissaporti d-disfatta mingħajr ma taqta’ jiesek – kif qal wieħed kapurjun f’dal-qasam: “Aħna ttribulati b’kull mod, iżda mhux mgħaffġin; perplessi, iżda mhux niddispraw; ippersegwitati, iżda mhux abbandunati; mixħutin mal-art, iżda mhux meqrudin. Dejjem inġorru f’ġisimna l-mewt ta’ Ġesù, sabiex il-ħajja ta’ Ġesù wkoll tkun immanifestata f’ġisimna!” (2 Korintin 4:8-10).
Tumas t’Akwino għandu perspettiva konservattiva imma denja tkun ikkonsidrata nkwantu l-kuraġġ. Jgħid: “L-att prinċipali tal-kuraġġ hu meta tissaporti u tirreżisti l-perikli b’fermezza aktarx milli tattakkahom.” Qisu l-istess strateġija ta’ ġensna matul l-Assedju l-Kbir – inħallu l-Ġannizzri u l-Ispaħin jaħbtu għalina; kull meta jersqu, inkunu lesti għalihom, minn wara s-sigurtà tas-swar godlija. Jekk dan hu minnu, il-kuraġġ veru u l-korteżija dejjem imorru id f’id. Issib allura li n-nies l-aktar kuraġġjużi huma dawk li jaħfru bla ma jkewtlu, u huma dejjem ansjużi biex jevitaw il-battibekki u t-tilwim ta’ kull xorta.
Talba: “O Missier, b’Ibnek uniġenitu għandna kuraġġ ta’ sur. Seddaqna, mela, f’dan l-arti, illi nkunu nafu f’liema direzzjoni mmorru, ma’ min u sakemm. Ikunx fosk it-temp jew bnazzi, mirjieħ jew kalm, huwa irrelevanti, għax int tiċċirkondana bl-imħabba fidila u tenera tiegħek. Ħalleluja! Ammen.”
Comments