“‘Jien hu Ġesù, li int qed tippersegwitah,’ wieġeb is-Sid. ‘Issa qum u oqgħod fuq saqajk, għax għal dan l-għan dhertlek, biex nappuntak attendent u xhud kemm tal-ħwejjeġ li rajt fija kif ukoll tal-ħwejjeġ li għad nidhirlek. Neħilsek mill-poplu tiegħek u mill-Ġentili, li għandhom jien qed nibagħtek ħalli tiftħilhom għajnejhom, biex iduru mid-dlam għad-dawl u mid-dominju ta’ Satana lejn Alla, sabiex jirċievu l-maħfra tad-dnubiet u post fost dawk imqaddsin bil-fidi fija’” (Atti 26:15-18).
Għandek fidi ġenwina? It-test prammatiku li wieħed jista’ japplika huwa kif qed jittratta mad-dnub, hux qed jimmortifikah biex serjetà jew inkella jilgħab miegħu. Kulħadd jagħraf id-differenza bejn l-iżgirma u l-issarar għall-ħajja. L-ipokritu joffri biss riforma taparsi: jagħmel għagħa u fratterija sħiħa kontra dnubu filli jistqarru u jitlob dwaru, u jinqeda b’mezzi oħra, frattant qajla għandu riżoluzzjoni biex jarmih bogħod minnu. Aktarx, jaħmlu u jżommu bħala ħabibu, filwaqt li pubblikament jabbużah bħala l-għadu tiegħu.
Il-persuna konvertita tikkomporti ruħha l-kuntrarju. Għalkemm il-fdalijiet tad-dnub jibqgħu miegħu matul għomru, madankollu inkwantu r-renju tad-dnub fuqu, huwa determinat illi jxejnu, jisfidah kuljum u jissielet kontrih b’impenn. Jaf li jew id-dnub inkella hu se jkollu jmut. L-ipokritu jilgħab l-iżgirma, il-konvertit ġenwinament jinsab fi dwell mortali.
Il-konvertit ma jibqax statiku. Biex nagħtu illustrazzjoni oħra, kif il-fidili kollha jikbru fil-grazzja, ħares lejn tifel impenġi u tifel ħaj. It-tifel ħaj jista’ jkun ċkejken u debboli, u frattant aktar ma jmur aktar jikber u jissoda. It-tifel impenġi jista’ jkun isbaħ minnu, iżda kif ikun jibqa’.
Ladarba l-qalb hi mġedda, ladarba l-Ispirtu jgħammar fil-persuna, ir-riżultat jidher minn barra, inevitabbilment. Sakemm ir-roti tal-arloġġ jiċċaqilqu minn ġewwa, il-minutieri fuq wiċċ l-arloġġ jitħarrku minn barra. Meta qalb il-bniedem hi konvertita, indubjament il-ħajja fl-azzjoni, fid-diskors u f’kollox, turi.
Talba: “Mulej Alla, x’regħxa u x’disfatta tkun jekk fl-aħħar jum ninkixfu bħala foloz! Tħalliniex nibqgħu għaddejjin komdi, sodisfatti bina nfusna. Għall-kuntrarju, xprunana għall-kisbiet ogħla; agħtina aktar u aktar evidenzi illi tabilħaqq aħna reċipjenti tal-grazzja tiegħek, filli nħobbuk b’qalbna u b’ruħna kollha, u l-proxxmu bħalna nfusna.”
Comments