“Pietru, appostlu ta’ Ġesù Kristu, lill-għorba tad-djaspora fil-Pontu, il-Galazja, il-Kappadoċja, l-Asja u l-Bitinja, il-magħżulin skont l-għarfa minn qabel t’Alla l-Missier, bit-taqdis tal-Ispirtu, għall-ubbidjenza lejn Ġesù Kristu u t-traxxix ta’ demmu: il-grazzja u s-sliem ikunu mmultiplikati lilkom. Imbierek ikun Alla u Missier Sidna Ġesù Kristu! Skont il-miżerikordja kbira tiegħu tana twelid ġdid għal tama ħajja permezz tar-resurrezzjoni ta’ Ġesù Kristu mill-imwiet, għal wirt inkorruttibbli, mhux ikkontaminat u ma jidbielx, riżervat fis-smewwiet għalikom, li qed tkunu protetti mis-setgħa t’Alla permezz tal-fidi għal salvazzjoni lesta biex tkun irrivelata fl-aħħar żmien” (1 Pietru 1:1-5).
Il-Kristjan hu neċessarjament wemmien f’Alla wieħed, li hu tliet persuni: il-Missier, l-Iben u l-Ispirtu s-Santu. Biex ikun spiritwalment b’saħħtu, ma jistax jaffordja illi jonqos minn relazzjoni bilanċjata ma’ Alla Trinità.
Jekk jittraskura lill-Missier jitlef il-fokus fuq l-istaljati illi jippreskrivi u d-dixxiplina paterna tiegħu. Konsegwentement il-Kristjan isir wild imħajjem u għażżien, iċċentrat fuqu nnifsu u instabbli. Jagħmel għajb lill-Missier, is-sors ta’ kull barka tiegħu.
Jekk jittraskura lill-Iben, il-meditazzjoni tiegħu ma tibqax fuq it-tpattija tas-salib li biha għandu s-sliem u l-ħajja. Jinsa li fuq il-leminija tal-Maestà fl-ogħla smewwiet għandu sommu saċerdot jirrappreżentah, u interċessur jidħol għalih kull mument. Ma jibqax fuq l-allert għall-parusija, jew miġja, glorjuża tiegħu fl-aħħar jum. Bla ma jinduna jiżżerżaq lura f’għadira ta’ legaliżmu, ir-reliġjon naturali tal-bniedem.
Jerġa’, jekk iwarrab lill-Ispirtu s-Santu jkun qed jitlef it-tgawdija tiegħu ma’ Kristu Sidu. Hu l-Ispirtu li joħloq din ix-xirka; hu l-Ispirtu li jġeddu; hu l-Ispirtu li jassigurah u jevoka fih radd il-ħajr; hu l-Ispirtu li jfornih bil-qawwa biex iservi bla ma jiżloq fil-formaliżmu; hu l-Ispirtu li jżommu ħieles minn reliġjon ta’ aspirazzjoni u perspirazzjoni mingħajr la ispirazzjoni u lanqas trasformazzjoni.
Talba: “O Alla Trinità, int tgħammar fil-għoli, merfugħ u eżaltat infinitament, u frattant titbissem fuq l-umli u l-ġwejjed. Ħa jiddi dawl wiċċek fuqna. Ħa tkun il-grazzja ta’ Sidna Kristu fuqna; ħa nitgħawmu f’imħabbet il-Missier; ħa nirrelataw u ngawdu komunjoni flimkien miegħek bl-operazzjoni tal-Ispirtu s-Santu.”
Comments