“O Mulej, inti taf; ftakar fija, u ħu ħsiebi. Agħmel vendetta għalija minn dawk li jippersegwitawni; tneħħinix minħabba fis-sabar tiegħek. Kun af li jien minħabba fik mgħajjar. Hekk kif sibt kliemek, blajtu; u kelmtek kienet għalija ferħ u għaxqa ta’ qalbi; għax jien nissemma b’ismek, o Mulej, Alla tal-eżerċti. Ma qagħadtx fil-laqgħa tal-ferrieħa, u lanqas fraħt; qgħadt waħdi għax idek kienet fuqi” (Ġeremija 15:15-17).
O li kieku mhux biss nisimgħu, naqraw, nimmarkaw u nitgħallmu, iżda fil-ġewwieni tagħna niddiġerixxu l-Iskrittura Mqaddsa ħalli nobduha! Appena l-Mulej jibda jittratta mal-midneb biex iqarrbu lejh, jurih l-ewwel nett il-qagħda miskina tiegħu, midneb ikkundannat, imbagħad jurih l-eċċellenza ta’ Kristu Ibnu u s-suffiċjenza tas-sagrifiċċju mitmum tiegħu għall-maħfra. Ikompli biex jagħtih id-don tal-indiema biex jitlaq l-idoli tiegħu u jħaddan lil Kristu, it-tama unika għal ruħu. Iva, jibda jistma l-Iskrittura, il-Kelma li ħarġet minn fomm Alla, bħala l-ikel kwotidjan tiegħu. Id-dottrini tal-grazzja jsiru għalih l-hena u l-feliċità kollha ta’ qalbu.
Ħa nagħtu glorja lir-Ragħaj il-kbir tagħna! Isib in-nagħaġ tiegħu, imferrxa u mġewħa, ipperikolati fuq il-muntanji ħawlija u l-wileġ għerija. Bl-għasluġ u l-ħatar tiegħu imexxihom lejn il-mergħat iħaddru tal-evanġelju. Jitmagħhom bil-grazzja, isostnihom bl-imħabba eterna tiegħu. Iżommhom skont il-fedeltà infallibbli tiegħu. Huma, daparti tagħhom, jistgħu jeħduha kontra l-patt; hu qatt u qatt ma jikser il-patt magħhom. Jindokrahom, jagħtihom li jimteddu u jistrieħu maġenb l-ilmijiet ta’ serħan, fis-sliem u t-tgawdija ta’ maħfra u ġustifikazzjoni. Iwegħidhom illi jibqgħu jgħammru f’daru l-jiem kollha, issa u fl-eternità.
Talba: “Mulej setgħani, l-arranġament tiegħek magħna jtellagħlna lil ruħna f’konfort ineffabbli; jimmiljora l-feliċità spiritwali tagħna. Ħa nkunu kapaċi nagħtu testimonjanza quddiem in-nies illi aħna nissemmew b’ismek, o Mulej, Alla tal-eżerċti! Biss ħa nagħmlu dan, mhux bil-ħila tagħna, mhux bis-saħħa umana, iżda bl-Ispirtu tiegħek.”
Comments