“Nirringrazzja ’l Kristu Ġesù Sidna, li għamilni setgħan, għax ikkonsidrani fidil u appuntani f’das-servizz, avolja darba kont midgħi u persekutur u insolenti. Frattant sibt ħniena għax aġixxejt bl-injoranza u fl-inkredulità; il-grazzja ta’ Sidna tfawret fuqi, bil-fidi u l-imħabba li huma fi Kristu Ġesù. Affidabbli l-affermazzjoni u jistħoqqilha aċċettazzjoni sħiħa, illi Kristu Ġesù ġie fid-dinja biex isalva l-midinbin – li fosthom jien l-ewlieni. Iżda minħabba f’hekk sibt ħniena sabiex fija, l-ewlieni, Kristu Ġesù juri l-paċenzja kollha tiegħu bħala eżempju għal dawk li għandhom jemmnu fih għall-ħajja eterna. Issa lis-Sultan etern, immortali, inviżibbli, l-uniku Alla, ikunu unur u glorja għal dejjem ta’ dejjem. Ammen” (1 Timotju 1:12-17).
Il-ħniniet t’Alla huma innumerabbli, ħniniet kemm ordinarji kif ukoll straordinarji. Għax Alla jissupplixxi n-neċessitajiet komuni tagħna, kif ukoll jagħnina bi provvista rimarkevoli li irregolarment nirċievu minn idejn Alla. Faħħru u thenna fih, mhux biss għal xi ħniena mhux mistennija, lil hinn mill-istħajjil tiegħek, dik il-ħniena li kulħadd kapaċi josservaha u jinnotaha, iżda esprimi r-rikonoxximent tiegħek għall-miżerikordji kwotidjani, tas-soltu, abitwali. Tiktibx barkietek fl-ilma, u l-afflizzjonijiet tonqoxhom fl-irħam.
Dawn il-ħniniet komuni nirċevuhom bl-irfus, u ma jmissniex ingawduhom mingħajr ma nkunu konxji tagħhom quddiem Missierna, li l-grazzja tiegħu hi multivarjegata. David jgħidlu, “O Alla, kemm hu kbir l-għadd tagħhom! Kieku kelli ngħoddhom, huma iżjed mir-ramel.” X’inhu eħfef minn partiċella ta’ ramla, li bilkemm taraha fuq il-pala t’idek. U frattant x’inhu itqal mir-ramel fuq l-ispjaġġa? Flimkien, il-ħniniet komuni mill-id providenzjali t’Alla jegħlbuna bl-iskantament – jekk għandna għajnejn biex jaraw. Benestant juri wisq aktar ħniena meta jżomm tallab jiekol miegħu s-sena kollha, milli meta jorganizza tratteniment darbtejn jew tliet darbiet fis-sena.
Ħa nieħdu nota tal-ħniniet, iva, kbar jew żgħar – mingħajr ma ninsew lil Alla tal-ħniena. Pietru ħallielna did-dossoliġija: “Imbierek ikun Alla u Missier Sidna Ġesù Kristu! Skont il-miżerikordja kbira tiegħu tana twelid ġdid għal tama ħajja permezz tar-resurrezzjoni ta’ Ġesù Kristu mill-imwiet, għal wirt inkorruttibbli, mhux ikkontaminat u ma jidbielx, riżervat fis-smewwiet għalikom,” (1 Pietru 1:3-4).
Pawlu sikwit jinfexx f’lodi spontanju lil Alla: “Imbierek ikun Alla u Missier Sidna Ġesù Kristu, Missier il-mogħdrijiet u Alla ta’ kull faraġ, li jfarraġna fl-afflizzjoni kollha tagħna” (2 Korintin 1:3-4).
L-għotjiet benevolenti u ġenerużi t’Alla qatt ma ntogħmuhom tant ħelwin daqs meta jfakkruna dwar is-Salvatur. Ingħad dwar Sokrate illi kien japprezza aktar wiċċ is-sultan milli l-munita bix-xbieha tas-sultan. Dan messu jkun realizzat minn kull qalb Kristjana.
Talba: “Nirrealizza, Missier smewwieti, illi r-relazzjoni bejnietna hi msejsa mill-bidu sat-tmiem fuq il-ħniena tiegħek, murija fil-patt ratifikat minn Ibnek meta ta lilu nnifsu bħala sagrifiċċju biex dnubieti jiġu kanċellati. Tħallini qatt nabbuża minn din il-wirja stupenda ta’ miżerikordja kontinwa lejja. Aktarx, ħa nkun motivat biex inħobbok b’qalbi kollha.”
Comments