“Mela tistħix tagħti x-xhieda tiegħek dwar Sidna, lanqas dwari l-priġunier tiegħu, iżda sofri miegħi għall-evanġelju skont is-setgħa t’Alla, li salvana u sejħilna b’sejħa qaddisa, mhux minħabba l-opri tagħna, iżda minħabba l-għan u l-grazzja tiegħu stess, mogħtija lilna fi Kristu Ġesù qabel il-bidu taż-żmien, imma issa rrivelata permezz tal-manifestazzjoni tas-Salvatur tagħna Kristu Ġesù, li abolixxa l-mewt u ġab il-ħajja u l-immortalità għad-dawl permezz tal-evanġelju” (2 Timotju 1:8-10).
Smajna dibattiti interminabbli dwar jekk ruħna hix immortali jew le, bħallikieku n-nies, minn kull epoka u ġens, kolti u barbari, ilsiera u nobbli, minn kull saff tas-soċjetà, ma jistgħux jirrikonċiljaw lilhom infushom għas-silenzju tal-qabar. Mhux wieħed jew tnejn huma ossessjonati dwar x’se jiġri minnhom la jagħlqu għajnejhom, x’vista se tiġi quddiemhom, u meta jinżlu fit-trab f’liema demanju se jkunu mgħollija. B’impenn dedikat bħal tal-Faragħunijet, li ġiegħlu jkunu mibnija l-piramidi bħala l-għamara tagħhom, dawn in-nies moderni għadhom ma jistgħux jemanċipaw lilhom infushom minn dil-manija jew fissazzjoni, il-faxxinu ta’ lil hin minna. L-umanità inġenerali, nistgħu ngħidu, tinqabad fuq sieq waħda u inevitabbilment turi kemm hi kommessa għa xi tip ta’ twemmin f’ħajja wara l-mewt fiżika.
Forsi nistgħu nargumentaw illi d-diversità ta’ twemmin iwaqqa’ u jġib fix-xejn dit-tama, li mhi xejn aħjar minn ħolma puwerili. Ċiċerun jgħid illi jekk jien ninsab żbaljat fit-twemmin tiegħi illi l-erwieħ tal-bnedmin huma immortali, qed niżbalja feliċitament, u ma nixtieqx nitlef errur tant għaxxieqi. Hekk nintebħu li joħlom biss dak li mhux sodisfatt bir-realtà, u jinfexx jinbi l-gastellinarja bħala tpattija.
Imma, ngħid jien, l-istess nuqqas ta’ sodisfazzjon bi kwalunkwe soluzzjoni oħra hi evidenza leqqiena tal-immortalità tagħna. Veru, il-velu tal-misterju għadu ma tneħħiex, u bħalissa naraw imċapjar; imma mhu xejn assurd jekk ninqabdu nħarsu ’l fuq lejn is-sħab u ngħidu li hemm realtà metafiżika lil hinn mill-fiżika.
Fin-natura għandna wkoll lehmiet, indikazzjonijiet indiretti tat-tama quddiemna. Bħalma ż-żerriegħa tmut għal ġo ħajja ġdida, hekk ukoll il-bniedem. U bħalma x-xemx tegħreq fil-Punent, ikun biss il-preludju għall-preżentazzjoni ġdida tagħha l-jum ta’ wara. Il-ġisem hu manifestament trab; ir-ruħ hi l-blanzun li jinfetaħ fl-eternità. Imnissla minn fuq, ir-ruħ hi msejħa żżomm korsa smewwitija. Difatti, mimsusa bil-grazzja, tħobb tiftaħ ġwenħajha lil hinn mid-dinja. Nafferma li l-għaref ma jistax isib sodisfazzjon fi ħwejjeġ għaddiena, u lanqas ma jislef qalbu lil xi ħaġa li tiddependi fuq iż-żmien.
Imma l-prova inkonfutabbli tahielna s-Sid li hu nnifsu sawwarna b’dan l-għatx għall-eternità, u tefa’ f’ruħna stess il-ħsieb tagħha jtektek fina. Hu dikjarat li b’mewtu u bir-reżurezzjoni tiegħu qered il-mewt u dawwal il-ħajja u l-immortalità permezz tal-bxara t-tajba dwaru nnifsu. Allura “meta dal-korruttibbli jkun tlibbes l-inkorruttibilità, u dal-mortali jkun tlibbes l-immortalità, imbagħad tkun avveriet ruħha l-kelma l-miktuba: ‘Il-mewt inbelgħet fil-vittorja.’ ‘Ja mewt, fejn hi l-vittorja tiegħek? Ja mewt, fejn hi n-niggieża tiegħek?’” (1 Korintin 15:54-55).
It-twemmin li m’aħna ħa mmutu qatt hu l-pedament ta’ għixien meqjus u dehni, imbottat mill-imħabba. Għax hemm differenza bejn tkompli teżisti u tkompli tgħix.
Talba: “Sidna Ġesù, bir-resurrezzjoni tiegħek kif ukoll b’tagħlimek urejtna kif ’l hinn minn dal-wied ta’ dmugħ hemm ħajja tistenniena. Ma titkejjilx bis-snin u s-sekli; hi l-milja tal-imħabba. Għax għad tiġborna f’darek, u allura lilek infaħħru, għax int turina l-mogħdija tal-ħajja; quddiemek hemm il-milja tal-ferħ. Fuq lemintek hemm għaxqa dejjema. Ammen.”
Comments