Skip to main content

Separati Għal Sidna

“Imma meta dehret il-bontà u l-imħabba t’Alla s-Salvatur tagħna lejn il-bniedem, salvana, mhux minħabba l-opri li konna għamilna fil-ġustizzja, iżda skont il-miżerikordja tiegħu. Salvana bil-ħasil tat-twelid mill-ġdid u t-tiġdid tal-Ispirtu s-Santu, li sawwab fuqna ġenerożament permezz ta’ Ġesù Kristu s-Salvatur tagħna, sabiex, iġġustifikati bil-grazzja tiegħu, insiru werrieta skont it-tama tal-ħajja eterna. Affidabbli l-affermazzjoni. U rridek tenfasizza dwar dawn il-ħwejjeġ, sabiex dawk li emmnu f’Alla jieħdu ħsieb jingaġġaw fl-opri t-tajba. Dawn il-ħwejjeġ huma tajbin u siewja għall-bnedmin” (Titu 3:4-8).

Definittivament, mingħajr qdusija ħadd ma jara wiċċ Alla; imma biex wieħed jibda jitqaddes l-ewwel irid ikun ġustifikat bid-demm imxerred tal-Ħaruf li ngħata biex ineħħi d-dnub tad-dinja. 

Il-karattru Ċiniż għal “ġustizzja” hu mill-aktar interessanti. Hu attwalment kompost minn żewġ karattri separati – wieħed jissinifika “ħaruf,” u l-ieħor “jien.” Meta “ħaruf” hu mqiegħed direttament fuq “jien,” hu fformat karattru ġdid – “ġustizzja,” ossija, qagħda sewwa quddiem Alla. 

Din l-istampa tgħinna napprezzaw il-grazzja divina. Bejni, il-midneb kredenti, u Alla, il-Qaddis, indaħal il-Ħaruf t’Alla. Minħabba s-sagrifiċċju tiegħu, jien milqugħ permezz tal-fidi fih, u hekk magħdud bħala ġust quddiem l-Imħallef tas-sema u l-art.

Biex ningħataw merħba dejjiema quddiemu, l-opri tagħna huma irrelevanti. Luteru jgħid, “Min jixtieq jikseb qagħda aċċettabbli quddiem Alla bil-fidi u bl-opri tiegħu jixbah dak il-kelb għaddej max-xmara b’biċċa laħam f’ħalqu. Imqarraq bir-rifless tal-laħma fl-ilma, jiftaħ ħalqu biex jaħtaf il-laħma, u hekk jitlef kemm il-laħma kif ukoll ir-rifless.”

Alla jgħodd lill-fidil bħala ġust fuq il-merti esklussivi ta’ Ibnu. Immedjatament imbagħad jibda jittrasformah fix-xbieha ta’ Ibnu stess. Biex wieħed jottieni dil-barka tal-qdusija jrid jgħaddi minn proċess li jtul għomru kollu. Hi l-istink ta’ snin; ċertament mhijiex ħaġa istantanja. Il-qdusija ma tikkonsistix filli tagħmel ħwejjeġ mhux tas-soltu, imma li tagħmel il-ħwejjeġ kollha tas-soltu b’fervur mhux tas-soltu. B’fervur fuqek innifsek, għax ma tistax tgħin lil ħaddieħor lejn Sijon jekk int innifsek għadek izzappap. Difatti hemm xi ħaġa suspettuża, f’wieħed li jippretendiha bħala qaddis, illi hu mbottat kostantement b’xewqa bla sabar biex jirriforma lil ħaddieħor meta hu nnifsu kkakkma. 

Irrid ngħin lili nnifsi biex ngħin lil ħaddieħor, u ngħin lili nnifsi l-aħjar billi nittraduċi l-grazzja fija f’atteġġjament u azzjoni ta’ mħabba. Il-livell ta’ mħabba tiegħi lejn il-Missier, b’risponsorjal għal ħnientu lejja, hi indikata infallibbilment mill-grad ta’ ubbidjenza tiegħu għall-kmandamenti tiegħu. Daqshekk sempliċi, daqshekk profonda. 

Talba: “Ladarba tibda biex issalvana, Mulej Alla omnipotenti, issalvana kompletament. Int ma tabbandunax ħidmet idejk, u d-doni mogħtija minnek ma jittiħdux lura. Għaldaqstant nesprimu l-konfidenza tagħna fik: qaddisna għalik innifsek, biex inkunu dixxipli magħrufa tiegħek, karatterizzati mill-imħabba. F’isem Ibnek. Ammen.”

Comments

Popular posts from this blog

Id-Drawwa

“Ġesù rritorna fis-setgħa tal-Ispirtu fil-Galilija, u r-rapport dwaru infirex mal-inħawi kollha. Hu għallem fis-sinagogi tagħhom, imfaħħar minn kulħadd. Mar f’Nażaret, fejn trabba, u skont id-drawwa tiegħu mar fis-sinagoga f’jum is-Sibt. U qam biex jaqra Tnewwillu l-iskroll tal-profeta Isaija. Fetaħ l-iskroll u sab il-post fejn kien hemm miktub: ‘L-Ispirtu tas-Sid fuqi għax unzjonani ħalli nxandar l-evanġelju lill-foqra. Bagħatni nipproklama l-liberazzjoni lill-ikkaptivati, u dawl mill-ġdid lill-għomja, nibgħat illiberati lill-oppressati, nipproklama s-sena favorevoli tas-Sid.’ Imbagħad gerbeb l-iskroll, raddu lill-attendent u ntnasab bilqiegħda. Għajnejn kulħadd fis-sinagoga kienu ssommati fuqu, u beda billi qalilhom, “Illum twettqet din l-Iskrittura li għadkom kemm smajtu’” (Luqa 4:14-21).  Hu sinifikanti ħafna kif hawn jingħad illi Ġesù attenda l-qima fis-sinagoga “skont id-drawwa tiegħu.”  Id-drawwa, imħaddma tajjeb u bil-għaqal, fiha valur imprezzabbli. Issirilna t-tien

Qawwija fid-Dgħufija

“U mqar jekk l-evanġelju tagħna hu mgħotti, hu mgħotti biss għal dawk li qed jintilfu. Fil-każ tagħhom l-alla ta’ daż-żmien għema mħuħ il-miskredenti, sabiex ma jiddix fuqhom it-tidwil tal-evanġelju tal-glorja ta’ Kristu, li hu l-immaġni t’Alla. Għax mhux lilna nfusna nippritkaw, iżda ’l Kristu Ġesù bħala s-Sid, u aħna nfusna l-qaddejja tagħkom minħabba Ġesù. Għax Alla, li qal, ‘Ħa jiddi d-dawl mid-dlam,’ huwa dak li idda fi qlubna għat-tidwil tat-tagħrif tal-glorja t’Alla f’wiċċ Kristu. Imma għandna dat-teżor f’reċipjenti xaqqufin sabiex jintwera li din l-eċċessività tas-setgħa tappartieni għal Alla u mhijiex minna nfusna” (2 Korintin 4:3-7). Hemm kontinwità fil-fidi: ninsabu f’suċċessjoni ta’ demm martri. Ħa ngħaddu t-torċa minn id għall-oħra, minn ġenerazzjoni għall-oħra. Apparti l-fidili fil-knisja stabbilita, insibu n-Novatjani, id-Donatisti, il-Valdiżi (seklu 12), l-Albiġiżi (seklu 13), il-Lollardi (wara Wiklef fis-seklu erbatax), l-Aħwa Boħemjani (seklu 15), u l-Anabattis

Rebbieħa Ma' Kristu

“Madankollu għandi naqra ħwejjeġ kontra tiegħek: għandek hemmhekk nies li jżommu mat-tagħlim ta’ Balgħam, li għallem lil Balak biex jitfa’ ostaklu quddiem ulied Iżrael, ħalli jieklu ikel sagrifikat lill-idoli, u jiffornikaw. Hekk int għandek ukoll lil dawk li bl-istess mod iżommu mat-tagħlim tan-Nikolajtin. Indem mela! Altrimenti se niġi għandek malajr u nikkumbatti kontrihom bix-xabla ta’ fommi. Min għandu widna, ħa jisma’ x’jgħid l-Ispirtu lill-knejjes. Lil min ivinċi nagħtih mill-manna l-moħbija. Nagħtih ukoll ġebla bajda, u fuq il-ġebla isem ġdid miktub li ħadd ma jafu ħlief min jirċeviha” (Rivelazzjoni 2:14-17). Qalb tiegħi, tqanqal biex tippersevera fit-taqbida qaddisa, għax il-premju tar-rebħa hu kbir. Illum nieklu mill-ikel smewwieti li jaqa’ madwar il-kampijiet tagħna, l-ikel li dejjem imantni ’ll-pellegrini fi triqthom lejn il-Kangħan. Iżda hemm merfugħ għalina fi Kristu Ġesù ikel spiritwali wisq ogħla, ikel li għalissa għadu moħbi mill-esperjenza tagħna. Fil-ġarra deh