“Għax imxennaq biex narakom, sabiex naqsam xi don spiritwali magħkom ħalli tkunu ssodati – voldiri, ħalli nkunu inkuraġġiti reċiprokament sakemm indum fostkom, permezz tal-fidi ta’ xulxin, kemm tagħkom kif ukoll tiegħi. Irridkom tkunu tafu, l-aħwa, illi sikwit ippjanajt biex niġi għandkom (imma s’issa kont ipprojbit) sabiex nikseb xi frott fostkom ukoll, bħalma tabilħaqq ġara fost il-bqija tal-Ġentili. Jien obbligat kemm lejn il-Griegi kif ukoll lejn il-barbari, kemm lejn l-għorrief kif ukoll lejn l-injoranti. Hekk, sakemm jiġi minni, ninsab ħerqan biex nipprietka l-evanġelju lilkom ukoll li qegħdin f’Ruma” (Rumani 1:11-15).
Is-sens ta’ meravilja fina hu missier ix-xjenza, mentri l-injoranza hi s-sliem tal-ħajja. Flimkien man-nuqqas ta’ kurżità, l-injoranza hi mħadda ratba li tistiednek tibqa’ titniegħes trankwill, għax min ma jaf xejn ma jiddubita xejn. F’ċerti komunitajiet rurali, maħkuma minn parrokkjaliżmu sfrenat, l-injoranza hi miżmuma fl-unur, u allura trid tkun iblah biex wieħed juri għerfu fosthom. Dawn jimxu fuq id-dettam illi kulma ma nafux ma jistax iweġġagħna. Ironikament, però, issib fosthom it-ton dommatiku, ispirat dejjem mill-injoranza profonda tagħhom. Attwalment l-injoranza qatt ma tissetilja kwistjoni, imma dawn diġà ssetiljaw kull kwistjoni.
Daqstant kolpevoli huma n-nies kburin bl-akkademja tagħhom; possibbilment din hi l-akbar speċi t’injoranza. Int min int għadek ma wasaltx, u l-gradwazzjoni tagħna mhix fuq din l-art; u allura mhuwiex qligħ żgħir meta nsiru konxji tal-injoranza tagħna nfusna.
Il-karattru tal-injorant jingħaraf minn ċerti marki indelibbli: il-vanità, l-arroganza u l-kburija. Għall-injoranza invinċibbli m’hemmx fruntieri jew limiti; hi bħal-lejl universali li fih inqabad il-moħħ, bħall-għama inkurabbli.
In-nies frustieri għas-Sid Ġesù, id-dawl tad-dinja, diġà saritilhom id-dijanjosi tagħhom; jingħad li “għandhom moħħhom imdallam, u mbegħdin mill-ħajja t’Alla, minħabba l-injoranza li qiegħda fihom u l-ebusija ta’ qalbhom, u billi ma jħossux, ixxewlħu għat-tbaħrid, biex jagħmlu b’kilba kull faħx.” Hekk mela x-xitan jaf x’inhu jagħmel, għax jassalta ’ll-bniedem meta jsibu battal mit-tagħrif jew inkella mill-biża’ t’Alla. U daqshekk ieħor jaf x’għandu jagħmel il-ħaddiem għas-saltna t’Alla: ixandar il-vanġelu kemm lill-injorant kif ukoll lill-għaref, għax it-tnejn għandhom bżonnu urġentement.
Talba: “Dewweb il-mistħija u r-riżerva fija, twajjeb Mulej. Tħallix it-timidità f’ruħi tkun xkiel hekk li neħel qisu f’gandott. Agħmel minni xandar fidil tal-evanġelju, għax f’dawlek biss naraw id-dawl. Ħa nistqarruk quddiem il-bnedmin ħalli int wkoll tistqarrna u tagħrafna quddiem Missierek fis-smewwiet. Ammen.”
Comments