“’L Alla ħadd qatt ma rah; imma jekk inħobbu ’l xulxin, Alla jgħammar fina u mħabbtu hi pperfezzjonata fina. B’dan nafu illi ngħammru fih u hu fina, għax tana mill-Ispirtu tiegħu. U aħna rajna u nixhdu illi l-Missier bagħat l-Iben bħala s-Salvatur tad-dinja. Kull min jistqarr illi Ġesù hu Bin Alla, Alla jgħammar fih u hu f’Alla. U allura aħna għarafna u emminna l-imħabba li Alla għandu għalina. Alla hu mħabba, u min jgħammar fl-imħabba jgħammar f’Alla, u Alla jgħammar fih” (1 Ġwanni 4:12-16).
L-imħabba hi dak il-ġojjell ewlieni fin-natura umana, imġedda fi Kristu, li tiddomanda biex tkun valutata kull fejn tinstab.
Inkwantu r-relazzjonijiet tagħna ma’ ħaddieħor, l-imħabba mhux biss hi mimlija bil-benevolenza, iżda wkoll bil-benefiċjenza. Mhux biss trid, iżda tagħmel ukoll. L-imħabba li twessa’ l-qalb qatt ma ddejjaq l-id. Bniedem karitattevoli, iżda li mhuwiex safi, hu aħjar għal ħaddieħor milli għalih innifsu.
Il-Kristjan ma jagħfasx fuq l-imħabba tant li jarmi l-verità; iżommhom bħala imprezzabbli t-tnejn. L-imħabba lejn Alla hi l-armatura tagħna kontra l-errur fatali. Minħabba li għandhom qlubhom privi mill-imħabba, in-nies jimlew moħħhom bl-iżball, u saħansitra bl-ereżija; opinjonijiet antiskritturali huma r-riżultat ta’ affezzjonijiet profani.
Bin Alla ma ġiex biex jippossiedi mħuħna b’qabda opinjonijiet kiesħa, li jrawmu influwenza ta’ nġazz u passività fi qlubna. Kristu hu l-Imgħallem fil-ħajja, mhux fil-kulleġġ. L-aħjar dixxiplu tiegħu hu dak li qalbu tħabbat b’polz l-aktar pur, u taspira għall-Ġenna; mhuwiex dak li rasu tinseġ l-ifjen għanqbuta.
Kristu jgħallimna nħobbu lil Alla bħala Alla. Jekk ir-rispett tiegħi lejn is-Salvatur jeżisti minħabba l-ħobżiet u l-ħut, qalbi tinġarr ’l hemm mal-qfief bil-loqom. Iżda jekk kapaċi nħobb ’l Alla għalli hu, bla motivi ulterjuri, din l-imħabba ttul lil hinn miż-żmien, u tegħleb il-mewt. Ftit huma dawk li jimxu warajh għall-imħabba; ħafna jimxu warajh biex jiddobbaw il-ħobż b’xejn. Ftit huma dawk li jsegwuh għall-eċċellenzi ġewwiena tiegħu, iżda bosta jsusu warajh għall-vantaġġi esterni tagħhom infushom. Ftit huma dawk li jsiru dixxipli biex jagħmilhom tajbin, mentri ħafna huma dawk li jsegwuh biex mingħalihom jagħmilhom kbar.
Talba: “O Alla, int l-istess imħabba! Wassaltielna fl-għotja ineffabbli ta’ Ibnek stess, biex bih ngħixu quddiemek. Nesperjenzawha filli sawwabtha fina bl-Ispirtu s-Santu mogħti lilna. Ikkonvinċina illi mingħajr it-taħbit tagħna fl-imħabba ma nkunu xejn quddiemek ħlief żarżir u diskordja. Daħħalna kulma jmur f’armonija miegħek; għallimna nħobbu aktar u aktar. Ammen.”
Comments