“Tiġġudikawx, sabiex ma tkunux iġġudikati. Għax bl-istess mod kif tiġġudikaw se tkunu ġġudikati, u bil-kejl li tkejlu se jkun imkejjel lilkom. Għaliex tara l-iskalda f’għajn ħuk, imma ma tinnotax it-travu f’għajnek stess? Jew kif tista’ tgħid lil ħuk, ‘Ħallini nneħħilek l-iskalda minn għajnek,’ meta travu jinsab f’għajnek stess? Ja ipokrita, neħħi l-ewwel it-travu minn għajnek stess, u mbagħad tara sew biex tneħħi l-iskalda minn għajn ħuk” (Mattew 7:1-5).
Kif ġieli smajt l-Ingliżi jitkellmu, min jgħammar fis-serer m’għandux iwaddab ġebel, u lanqas m’għandek tipponta lejn iċ-ċappatini ta’ ħaddieħor b’subgħajk inkallat. Min m’għandux qalb biex jgħin lanqas għandu dritt jikkritika, imma fir-realtà tal-ħajja, imqar l-iljun ikolli jiddefendi lilu nnifsu kontra d-dubbien.
Hawn nista’ ndeffes ħrafa mill-pinna t’Eżopu. Ġove, Nettunu u Minerva darba kellhom kompetizzjoni bejniethom biex jiddeterminaw min minnhom kellu ħila jagħmel l-aktar ħaġa perfetta fid-dinja. Ġove għamel bniedem, Minerva għamlet dar, u Nettunu għamel gendus.
Momus – dan kien għadu mhux itturufnat minn Olimpu – inħatar biex jiġġudika liema mill-kreazzjonijiet kellha l-ikbar mertu. Beda billi sab difett fil-gendus għax qrunu ma kinux taħt għajnejh u għaldaqstant ma setax jara meta kien jirromba bihom. Għadda għal fuq il-bniedem, u lanqas għoġbu, għax ma kellux tieqa f’ħobbu biex il-ħsibijiet u s-sentimenti ġewwiena tiegħu jkunu jistgħu jidhru. Finalment, resaq fuq id-dar u wara li kemmex xofftejh qal illi lanqas ma fiha preġju, għax m’għandhiex roti biex fil-każ li l-abitanti tagħha jiddejqu mill-ġirien antipatiċi, ikunu jistgħu jallargaw.
Wara li Momus ippronunzja l-ġudizzji kollha tiegħu, Ġove keċċa lill-kritiku mis-smewwiet. Qallu, “Min hu ffissat biex isib id-difetti qatt ma jista’ jogħġbu xejn. Imma almenu, tmaqdarx ix-xogħlijiet ta’ ħaddieħor qabel ma tkun ħloqt xi ħaġa sura int innifsek!”
Jekk ivvilifikaw lill-Qaddis t’Alla u ttimbrawh bħala indemonjat u miġnun, m’għandix għalfejn nieħu għalija. “Ftakru fil-kelma li jien għidtilkom: ‘Qaddej mhux ikbar minn sidu.’ Jekk lili ppersegwitawni, għad jippersegwitaw lilkom ukoll” (Ġwanni 15:20).
Frattant aħna, jekk għandna f’moħħna ngħaddu ’l quddiem u ntejbu s-soċjetà tagħna, il-qadi ta’ dmirijietna jmissu dejjem ikun indipendenti mill-opinjoni pubblika. Jekk ma nadottawx dil-linja nibqgħu ma nwettqu xejn, għax jekk noqogħdu nistennew sakemm il-ħaġa nagħmluha perfetta hekk li ħadd ma jsibilha difett, nibqgħu ma nagħmluha qatt.
Talba: “Ja Sidi, la nista’ nbagħbas u lanqas nilgħab bil-verità tiegħek. Fi ħwejjeġ essenzjali tal-verità, nitolbok biex tagħmilni kolonna bla ma nċedi; fi ħwejjeġ sekondarji agħtini illi nitkellem u nisma’, biex ngħallem u nitgħallem; fi ħwejjeġ ta’ konvinzjoni għallimni nkun tolleranti bla ma nagħmel ħaqq minn ħaddieħor. Ammen.”
Comments