“Hu jsaltan ukoll minn baħar sa baħar, u mix-xmara sa truf l-art. Dawk li jgixu fid-deżert jitbaxxew quddiemu, u l-għedewwa tiegħu jilagħqu t-trab. Is-slaten ta’ Tarsis u tal-gżejjer iġibulu rigali; is-slaten ta’ Xeba u Seba jagħtuh għotjiet. Iva, is-slaten kollha jqimuh; il-ġnus kollha jaqduh. Għax hu jeħles lill-fqir meta jsejjaħlu, u lill-imsejken ukoll, u lil dak li m’għandu ’l ħadd min jgħinu. Hu jkollu ħniena mid-dgħajjef u mill-fqir, u jsalva l-erwieħ tal-fqar. Hu jifdi lil ruħhom mill-qerq u mid-dnewwa, u għażiż ikun demmhom quddiemu” (Salmi 72:8-14).
Il-batut jgħajjat; x’jista’ jagħmel iżjed? Alla jisma’ l-għajta tiegħu; x’hemm bżonn jagħmel iżjed? Jekk tinsab fil-bżonn, għajjat lill-Mulej, u ddumx, għax dan ikun għerf għalik. Tgħajjatx f’widnejn il-ħbieb, għax anke jekk jistgħu jgħinuk, jgħinuk għax il-Mulej jqawwihom biex jgħinuk. L-eqreb u l-eħfef triq hi li tirrikorri dritt għand il-Mulej, u tħalli l-għajta tiegħek titla’ quddiemu. Min jiġri dritt jiġri l-aħjar: iġri lejn il-Ħallieq, mhux lejn il-ħlejjaq.
Forsi tgħid, “Jaħasra jien, m’għandi ebda ħabib; m’hemm ħadd min jgħinni.” Tant l-aħjar; tista’ tafda fuq Alla biex jissupplixxik u jagħtik b’xejn. Anke għall-bżonnijiet temporali, ittama f’Alla, għax jinteressah minn uliedu fil-ħwejjeġ għaddiena wkoll. Rigward il-bżonnijiet spiritwali tiegħek, li huma l-itqal, il-Mulej jisma’ l-għajta tiegħek, u jeħilsek u ma jħallikx nieqes.
Ja ħabib fqajjar, ipprova lil Alla sinjur tiegħek. O bniedem bla saħħa, mil fuq l-għajnuna tiegħu. Lili qatt ma ddiżappuntani, u ninsab ċert li miegħek jimxi l-istess. Ejja għandu bħala tallab, u Alla ma jirrifjutax milli jgħinek. Ippreżenta biss l-argument tal-grazzja tiegħu.
Talba: “Ġesù, Sultan suprem u Sid ta’ kulma kien, hu u għad ikun, int ħarist lejn ix-xejn tagħna u frattant ilqajtna għandek. Mhux hekk biss, għamiltna sinjuri għax affermajtilna li kulma hu tiegħek hu tagħna; int fina u aħna fik. Grazzi tal-wegħda tremenda tiegħek: m’intix se tħallina nintilfu fi bżonnijietna.”
Comments