“Tassew, int toqtol il-ħażin, o Alla; għalhekk tbiegħdu minni, ja rġiel tad-dmija. Għax huma jitkellmu kontrik bil-qerq, u l-għedewwa tiegħek jieħdu jismek għalxejn. M’għandix nobgħodhom, o Mulej, lil dawk li jobogħduk? M’għandix nistmellhom lil dawk li jqumu kontra tiegħek? Nobgħodhom bl-ikbar mibegħda; ngħoddhom b’għedewwa tiegħi. Għarbilni, o Mulej, u agħraf lil qalbi; ġarrabni, u kun af ħsibijieti; u ara jekk hemmx xi triq ħażina fija, u mexxini fit-triq ta’ dejjem” (Salmi 139:19-24).
Bħalma ragħaj ma jehdiex milli jobgħod ferħ ta’ lupu avolja jkun għadu ma ħabatx għan-nagħaġ, u bħalma l-bniedem iħares biċ-ċiera lejn serp għadu żgħir minkejja li għadu ma beżaqx semmu, hekk il-Mulej jittratta magħna, u bir-raġun. Jiġġudikana bħala denji tal-mewt minħabba n-natura perversa u mniġġsa fina, u dan minn ġuf ommna, minħabba x-xeħta għad-dnub maħduma fina. David jistqarr: “Ara, jien kont imsawwar fil-ħażen, u fid-dnub nisslitni ommi” (Salmi 51:5).
Għax meta Adam dineb, billi kien ir-rappreżentant tagħna lkoll, miegħu u fih Alla jqis li dinbet l-umanità. “Għalhekk, bħalma daħal id-dnub fid-dinja permezz ta’ bniedem wieħed, u l-mewt permezz tad-dnub, u hekk il-mewt għaddiet għall-bnedmin kollha, peress li kollha dinbu – għax id-dnub kien fid-dinja qabel ma ngħatat il-liġi, imma d-dnub mhux magħdud meta m’hemmx liġi” (Rumani 5:12-13).
Mela kieku l-Mulej kellu jikkundannana lkoll, ma kien ikun qed jagħmlilna xejn inġustizzja, imma jroddilna biss dak li jistħoqqilna fin-natura tagħna. Allura meta jgħid bla ħabi, “Ħabbejt lil Ġakobb, imma bgħadt lil Għeżaw” (Rumani 9:13), l-għaġeb jew sorpriża m’għandhiex tkun illi jobgħod lil xi midinbin, bħalma kien Għeżaw, iżda illi jħobb lil xi wħud, li ma ħaqqhomx imħabbtu. Ovvjament, il-bnedmin jippretendu li Alla hu obbligat iħobbhom, avolja tilfu l-qagħda tagħhom quddiemu minħabba d-diżubbidjenza lejh. Fil-ġustizzja tiegħu Alla jkollu jiġġudika u jmantni qdusitu.
Frattant Alla afferma kemm-il darba illi ma jieħu ebda pjaċir bit-telfien tal-ħżiena. Ir-rabja tiegħu, bħat-tempju ta’ Dagon li Sansun waqqa’ fuq rasu stess, ma tinżilx fuqna ħlief meta niġbduha fuqna nfusna bi dnubna. U bħalma d-dispjaċir ta’ sultan iqanqal lis-sudditi kontra l-għadu tiegħu, hekk id-dispjaċir divin iqabbad il-ħlejjaq tiegħu kontra l-midneb.
Talba: “O Alla qaddis, tabilħaqq ma niħdux gost meta naraw midinbin jisfidawk, jiħħielqu bik u saħansitra jaffermaw illi lanqas biss teżisti. Int tissaportihom, però nafu illi appena jmutu fi dnubiethom ma jsibu xejn mingħandek ħlief għadab u qilla, għax int ma tiffrankahiex lill-ħatja. Grazzi, Mulej, talli int ħabbejtna bħalma ħabbejt lil Ġakobb, sabiex l-għan tiegħek skont l-għażla jibqa’. Ammen.”
Comments