“F’dan teżultaw bil-kif, avolja għal ftit ħin bħalissa, jekk jeħtieġ, qed titnikktu b’tiġrib varju, sabiex l-ipprovar tal-fidi tagħkom – iżjed prezzjuża mid-deheb, li jinqered allavolja hu ttestjat bin-nar – tinstab ġenwina u tirriżulta għat-tifħir, il-glorja u l-unur fir-rivelazzjoni ta’ Ġesù Kristu. Għalkemm ma rajtuhx, tħobbuh; u għalkemm bħalissa ma tarawhx, temmnu fih u teżultaw b’ferħ inesprimibbli u glorjuż, filwaqt li tottienu r-riżultat tal-fidi, is-salvazzjoni t’erwieħkom” (1 Pietru 1:6-9).
L-oriġni u l-għan primarju tal-ħajja soċjali huma l-konservazzjoni, l-iżvilupp u l-perfezzjoni tal-enti uman, biex ma’ sħabu u mingħandhom isib l-għajnuna biex jirrealizza b’akkuratezza d-domandi u l-valuri tal-fidi u l-kultura stabbiliti mill-Kreatur għal kull individwu u kull komunità. Is-soċjetà hi mibnija fuq l-afdar, u l-afdar fuq il-konfidenza fl-integrità ta’ ħaddieħor.
Għaldaqstant, mhux l-edukazzjoni, mhux il-politika, mhux l-ekonomija, hija r-rimedju għad-dinja, iżda l-formazzjoni ta’ karattru san li jservi ta’ partiketta u sies għal kulma jsir taħt ix-xemx. Nemmen li t-tama ewlenija tas-soċjetà tagħna hi l-karattru individwali, karattru li jibda jiġi mibni b’konverżjoni ġenwina u jibqa’ jimmiljora ruħu, għax il-karattru ma jiġix ippakkjat u lest, kemm tadottah istantanjament, imma hu maħluq farka farka, jum wara jum, sikwit b’mod imperċettibbli.
Fl-aħħar analiżi tiegħu, il-karattru hu biss il-konswetudini kontinwata fit-tul, li taqbel mal-umanità tagħna. Hu prodott fil-manifattura tremenda tad-dmir kwotidjan. Wettaq il-vokazzjoni tiegħek, u tkun qed issaħħaħ il-karattru, il-marka indelibbli x’int u x’m’intix, għaliex huwa evidenti li d-dinja tagħna hi ħanut tal-ħaddied, u kull wieħed minna hu inkwina jew inkella mazza.
Kulma jien fil-privat ma jistax jibqa’ mistur fit-tul. Jekk naġixxi żmerċ mill-bieb ’il ġewwa ma nippretendix li se nkun aħjar fil-komportament pubbliku. Għall-apparenza, jista’ jkun nilgħabha taċ-ċivili u manjeruż, imma essenzjalment għadni l-istess. Jekk naqa’ fil-baxxezzi taħt is-saqaf tiegħi, m’inix se noħroġ bl-unuri fil-misraħ.
Jekk niċċaħħad mill-assi u l-beni tiegħi, ma jkun intilef virtwalment xejn. Jekk nherri saħħti, inkun tlift xi ħaġa. Jekk ngħarraq il-karattru, inkun tlift kollox. Il-karattru jagħmilni onorabbli. Jekk naħdem il-parti tiegħi sewwa, hemm hu l-unur tiegħi. Avolja tkun parti modesta, m’għandix mniex nistħi. Kull min iservi ’l Alla huwa onorabbli; l-iżgħar qaddej tiegħu hu stmat quddiemu aktar mill-kbarat dinjija. L-istat tal-qalb, l-atteġġjament tagħha lejn Alla, tifforma l-unur veru tagħna. Mingħajr l-opinjonijiet tan-nies dwarna ngħaddu faċilment. Meta jkun il-Mulej innifsu li jonorana, imbagħad ħa nkunu lesti biex nirċievu l-unur, imma mhux b’mod prematur. Qabel inkunu manifestati bħala wliedu, hemm il-prova.
Talba: “Missier smewwieti, ma tagħmel xejn kapriċċjożament. Meta tipprovani noħroġ safi. Mingħajr prova ma nkunx naf xi nsarraf. Biss kun ħanin miegħi u weżinni tul il-prova biex la niddiżonora lilek, la lin-nies madwaru u lanqas inweġġa’ lili nnifsi, f’ġieħ Ibnek il-Maħbub. Ammen.”
Comments