“Għax Kristu ma daħalx f’xi Qaddis tal-Qaddisin magħmul bl-id, li hu sempliċi kopja tal-veru, iżda daħal fis-sema nnifsu, biex issa jidher fl-preżenza t’Alla għalina; lanqas sabiex joffri sikwit lilu nnifsu, bħalma s-sommu saċerdot jidħol fil-Qaddis tal-Qaddisin kull sena b’demm ħaddieħor. Altrimenti, Kristu kien ikun jeħtieġlu jbati ripetutament mill-ħolqien tad-dinja. Imma issa hu mmanifestat darba fi tmiem iż-żminijiet għat-twarrib tad-dnub permezz tas-sagrifiċċju tiegħu nnifsu. Bħalma l-bnedmin huma destinati li jmutu darba, u wara dan jiffaċċjaw il-ġudizzju, hekk ukoll Kristu, offrut darba ħalli jneħħi d-dnubiet ta’ ħafna, għad jidher għat-tieni darba, mhux biex jittratta mad-dnub, iżda għas-salvazzjoni ta’ dawk li qed jistennewh bil-ħeġġa.” (Ebrej 9:24-28).
Jum il-ġudizzju universali jista’ jkun remot; jum il-ġudizzju personali tiegħek hu viċin. Preċiżament kif tmut, hekk tinstab. Fl-istess kondizzjoni kif ruħek tħalli warajha lil ġismek, hekk ġismek jinstab minn ruħek. Impossibbli tgħaddi mis-sodda tal-mewt midneb, u tidher quddiem l-Imħallef bħala qaddis. F’mewtek u fl-Aħħar Jum se jkollok l-istess Imħallef, l-istess ġurija, l-istess xhieda, l-istess verdett.
Taf kemm hi ħaġa ċerta li se tmut; kemm fadallek biex tmut, ma tafx. Tkejjilx ħajtek bl-itwal għomor, altrimenti tkun qed tneffaħ lilek innifsek b’tama falza. Ma tista’ ssemmi ebda persuna, lanqas moribond fl-estremità tiegħu, illi tista’ tkun żgur illi se jmut qablek.
Il-ġudizzju hu ċert. “Dan jiġri fil-jum meta Alla jiġġudika s-sigrieti tal-bnedmin permezz ta’ Kristu Ġesù, skont kif jiddikjara l-evanġelju tiegħi” (Rumani 2:16). “Alla issa jikkmanda lill-bnedmin kollha kullimkien biex jindmu, għax iffissa jum li fih għandu jiġġudika d-dinja bil-ġustizzja, bil-bniedem li hu appunta. Ta’ dan forna prova ’l kulħadd billi qajmu mill-imwiet” (Atti 17:30-31). Is-Sid Ġesù annunzja: “Timmeraviljawx b’dan, għax ġej żmien li fih dawk kollha fl-oqbra għad jisimgħu leħnu u joħorġu – dawk li għamlu t-tajjeb għar-resurrezzjoni tal-ħajja, mentri dawk li pprattikaw il-ħażen għar-resurrezzjoni ta’ kundanna…Bħalma nisma’, niġġudika, u l-ġudizzju tiegħi hu ġust” (Ġwanni 5:28-30). Dikjarazzjonijiet simili huma mferrxa tul il-paġni tal-Iskrittura; ma nistgħux ninsew.
Kulma wieħed jobżoq lejn is-smewwiet jaqa’ f’wiċċu stess. Hemm post fl-Infern għall-avukat rgħib, għan-negozjant ambizzjuż, għal sid il-kera bla klemenza, għar-rgħajja li ġeżżew il-merħla flok ħadu ħsiebha, għaż-żagħżugħ lixxiv, għall-ħalliel bla kuxjenza, għall-eżekuttiv governattiv li abbuża mill-awtorità tiegħu, iva, għal dawk kollha li jmutu fi dnubiethom. Imqar minn did-dinja jħossu t-turment għax jafu li ma jistgħux jaħarbu. Il-ħniena hi offruta lilhom, iżda jidhrilhom li huma awtosuffiċjenti. Allura, ladarba ma ridux ikunu maħsula, jisfaw mgħarrqa.
L-Imħallef tal-art kollha ċertament jesegwixxi l-ħaqq fis-sewwa, u r-regola tapplika għal kulħadd. “Titqarrqux: ma nistgħux immasħru ’l Alla, għax kwalunkwe ħaġa li l-bniedem jiżra’, dik ukoll se jaħsad. Min jiżra’ biex jogħġob in-natura midinba tiegħu nnifsu, minn dik in-natura se jaħsad il-korruzzjoni; min jiżra’ għall-Ispirtu mill-Ispirtu se jaħsad il-ħajja eterna” (Galatin 6:7-8).
Talba: “Mulej Ġesù, kull awtorità fis-sema u fl-art hi mogħtija lilek. Nirrikonoxxuk bħala Sultan suprem fuq l-univers, fuq l-umanità u partikolarment fuq il-knisja tiegħek. Inbaxxu rasna quddiemek; ninxteħtu għarkupptejna quddiemek, għax hu int waħdek li għandek is-setgħa tagħti l-ħajja eterna lil dawk kollha mogħtija lilek mill-Missier. Gvernana int, għax ir-rieda tiegħek hi l-ħakma tal-ġustizzja tiegħek, u l-ġustizzja hi l-ħakma tar-rieda tiegħek. Ammen.”
Comments