“Issa kif ra l-folol, tela’ fuq il-muntanja u ntnasab bilqiegħda. Resqu lejh id-dixxipli tiegħu, u fetaħ fommu u qabad jgħallimhom billi qal: ‘Imberkin il-foqra fl-ispirtu, għax tagħhom hi saltnet is-smewwiet. Imberkin ix-xehiera, għax huma għad ikunu mfarrġin. Imberkin il-mansweti, għax huma għad jirtu l-art. Imberkin il-ġewwieħa u l-għatxana għas-sewwa, għax huma għad ikunu sodisfatti. Imberkin il-ħnien, għax huma għad jirċievu ħniena. Imberkin il-puri f’qalbhom, għax huma għad jaraw ’l Alla. Imberkin il-paċieri, għax huma għad jissejħu wlied Alla. Imberkin dawk li huma ppersegwitati minħabba s-sewwa, għax tagħhom hi saltnet is-smewwiet. Imberkin intom meta jinsultawkom u jippersegwitawkom, u jgħidu kull speċi ta’ ħażen kontrikom bil-gideb, minħabba fija. Ifirħu u eżultaw, għax il-premju tagħkom hu kbir fis-smewwiet, għax hekk ippersegwitaw lill-profeti qabilkom” (Mattew 5:1-12)
Ma jixraqx li Alla jaħfer lil dak li hu nnifsu ma jridx jaħfer. Il-beatitudni titkellem ċar: “Imberkin il-ħnien, għax huma għad jirċievu ħniena.” Alla jikkanċella d-dejn tal-fidili tiegħu biex ikollhom il-biża’ tiegħu, mhux biex jabbużaw mill-maħfra. Min irċieva b’xejn mingħand Alla jagħti b’xejn lill-proxxmu. Maħfur biex naħfer, u la naħfer għandi evidenza li Alla diġà ħafirli.
Lanqas jixraq illi Alla jissuplixxi l-bżonnijiet ta’ dak li qatt ma jagħti lill-proxxmu tiegħu. Alla jkejlilna bl-istess siegħ li nużaw aħna. In-nies illi jimxu bl-aħrax mal-imsejkna jsibu li l-Mulej jittratta magħhom bl-aħrax ukoll. “Għax il-ġudizzju se jkun bla miżerikordja għal min ma jurix ħniena” (Ġakbu 2:13).
Bħala dixxipli ta’ Ġesù l-manswet, messna nkunu lħiħa biex nipprovaw nagħtu u naħfru, filwaqt li nissaportu u nċedu. Aktar messna nikkonċentraw fuq dmirijietna milli fuq jeddijietna. Ħa nkunu mħarrġin fil-ħniena u l-kumpassjoni; ħa nkunu kbar fil-ġentilezza u t-tenerezza. Ma ninterpretawx l-azzjonijiet ta’ ħaddieħor ħażin, u lanqas inqabbdu difrejna biex naqilgħu tilwima. Mhuwiex lant noqogħdu nilagħbuha tad-diffiċli.
Għall-qalb mimsusa mill-Ispirtu, il-beatitudnijiet kif ħarġu minn fomm l-Imgħallem tagħna huma sbieħ u attraenti. Ċertament irridu nkunu mbierka; nixtiequ wkoll insibu ħniena quddiem Alla l-Ogħla. Ħa nkunu ħanina, u naqilgħu ħniena. Tkun ħasra l-beatitudnijiet ngħodduhom bħala sbieħ bla ma jsebbħu lil ħajjitna.
Ħa nwettqu l-kondizzjoni, mela, u l-beatitudni tkun tgħodd għalina. Mhux dover pjaċevoli tkun ħanin? Mhuwiex oħla turi ħniena milli tesprimi l-għadab u x-xeħħa tiegħek? Barra minn hekk, il-ħniena t’Alla fuqna hi premju sinjur, prattikament tant sorprendenti. Il-grazzja sovrana t’Alla tippreżentalna t-tali promessa. Aħna nuru ħniena ma’ ħutna bis-soldi, u l-Mulej jaħfrilna d-dejn inkalkolabbli tagħna kollu. M’hemmx paragun!
Talba: “Bħalma int perfett, o Alla, iddeterminajt illi aħna wkoll inkunu pperfezzjonati fil-karattru tagħna. Aħdem fina ħnientek; ma jixraqx inżommuha biss għalina. Daqskemm liberament is-sema jħaddan id-dinja, jew ix-xemx tferra’ imparzjalment l-imrieżaq tagħha, hekk il-ħniena jeħtieġ tiċċirkonda kemm lill-ħabib kif ukoll l-għadu tagħna. F’dan ir-rigward inħarsu lejk biex tassistina. Ammen.”
Comments