“O Alla, int Alla tiegħi; mis-sebħ infittxek jien. Ruħi għatxana għalik; laħmi mxennaq għalik f’art niexfa u maħruqa fejn m’hemmx ilma. Għalhekk ġejt narak fis-santwarju, biex nara s-setgħa u l-glorja tiegħek. Għax it-tjieba tiegħek hi aħjar mill-ħajja; xofftejja jfaħħru lilek. Għalhekk inbierkek sakemm indum ħaj; ngħolli jdejja f’ismek. Ruħi tixba’ bil-mudullun u s-simna, u fommi jfaħħrek b’xofftejn ferħana” (Salmi 63:1-5).
Meta Alla jmissek, imqar b’tgħarrixa, il-kuntatt divin jibqa’ jivvibra u ma jħallikx bi kwietek. Il-fidil, imqajjem u mgħajjex bil-grazza, issa għandu interess fil-ħwejjeġ fuqanija; l-ansjetà tiegħu hi illi jiskopri l-volontà tas-sema biex jinkorporaha fih, ħalli r-rieda fjakka tiegħu tinxtorob fir-rieda suprema.
It-tali desiderju għall-gwida hu għelm inkonfutabbli ta’ saħħa u vitalità spiritwali. Min ma jafx fejn wasal ftit jimportah x’għad fadallu xi jterraq quddiemu. Kristjan galbat irid jogħġob lil Sidu. Ħajtu ħadet żvolta radikalment differenti meta kien imwelled għat-tieni darba, fil-ġuf tal-imħabba divina. Issa, ħlejqa ġdida, iħobb l-ubbidjenza u jsib hena filli jsegwi intimament wara l-Imgħallem li ħatru u sejjaħlu. L-istess ħsieb illi joffendi lil min ġabru u naddfu jqisu b’orrur.
Fuq kollox jippjana biex kull mossa, kull ħsieb u kull kelma tkun konformi għar-rieda divina, dik ir-rieda tajba u aċċettabbli. Aktar ma jimmatura aktar jaspira għal mixja eqreb ma’ Sidu. Il-Kelma ma tibqax tissodisfah meta japprowċjaha akkademikament; hi l-Kelma li ħarġet minn fomm Alla, li ssostnih u turih it-triq.
Talba: “Mulej, Alla tagħna, aħna doqna u rajna kemm tabilħaqq int ħelu. L-istess ħsieb tiegħek jimlina b’għaxqa u ammirazzjoni, b’qima u adorazzjoni. Min hu bħalek, o Jaħwe, fost l-allat? Min kapaċi jitqabbel miegħek, kbir fil-qodos, tal-biża’ fit-tifħir, tagħmel l-għeġubijiet?”
Comments