“Lill-anġlu tal-knisja f’Sardi ikteb: ‘Dawn il-ħwejjeġ jgħid dak li għandu s-seba’ Spirti t’Alla u s-seba’ kwiekeb. Naf l-għemejjel tiegħek; int għandek reputazzjoni illi tgħix, frattant int mejjet. Stenbaħ! Issoda l-ħwejjeġ li jibqa’ u li appik ħa jmutu, għax ma sibtx l-opri tiegħek kompluti f’għajnejn Alla tiegħi. Mela ftakar x’irċevejt u xi smajt. Żommu, u indem. Però jekk ma tistenbaħx, se niġik bħal ħalliel, u ma tkunx taf f’liema siegħa niġi fuqek.Frattant għandek ftit persuni f’Sardi li ma ċappsux ilbieshom. Se jimxu miegħi f’ilbiesi bojod, għax huma denji. Min ivinċi jkun hekk imleffef f’ilbiesi bojod. Qatt mhu se nħassar ismu minn ktieb il-ħajja, imma nistqarrlu ismu quddiem Missieri u quddiem l-anġli tiegħu. Min għandu widna, ħa jisma’ x’jgħid l-Ispirtu lill-knejjes’” (Rivelazzjoni 3:1-6).
L-għan t’Alla, daqskemm hu żgur, hu immutabbli. Mhux il-bniedem jagħżel lil Alla, iżda Alla jagħżel lilna, bla ma jerġa’ jibdielu. Lil dawk li għażilhom, ħalaqhom, ippreparahom, sejħilhom, iġġustifikahom, qaddishom, u jigglorifikahom, għax l-għan tiegħu ma jafx b’kambjamenti kapriċċjużi, lanqas il-wegħda tiegħu ma tista’ tkun revokata mingħajr dannu għall-fama u l-glorja tiegħu.
Ħallih lil Sawl iħarbat lill-fidili, ixewlaħhom fil-kalzri, u jimmultiplika l-inġurja tiegħu kontra l-Irxoxtat; xorta waħda, fiż-żmien imwaqqat, billi hu magħruf għal Alla u għandu ismu miktub fil-Ktieb tal-Ħajja, jasal biex jitbekka għad-dagħa tiegħu, u jkun salvat. Maqtugħin minn barriera waħda, ta’ ħmieġ u korruzzjoni, iva, imma jitwasslu sas-saltna eterna, għax huma l-maħbubin t’Alla Trinità, l-istess għal dejjem ta’ dejjem.
Kieku mhux hekk, x’tama għandna għalina personalment, u xi speranza nistgħu nħaddnu illi għad naraw lil Babel rovinata, id-dominju tax-xitan destrutt u l-Ġisem Mistiku ta’ Kristu pperfezzjonat?
Il-Missier appunta lil Ibnu biex f’isimna jkun kontabbli għalina. Il-ħarsien u ċ-ċarġ tiegħu fuqna jestendu sal-jum aħħari meta nitqajmu mill-oqbra tagħna; bis-setgħa omnipotenti tiegħu ma jitlef lanqas it-trab tagħna, imma jsawru mill-ġdid, glorjuż u immortali, bħala prova tal-fedeltà kbira tiegħu, skont kif iddikjara, “Minn dak li tani, ma nitlef xejn, iżda nerġa’ nqajmu fl-aħħar jum.”
Din il-verità inkwantu l-predestinazzjoni tagħna tista’ tkun trattata żmerċ jew profitabbilment. Nabbużawha meta nutilizzawha biex mingħalina nissodisfaw il-kurżità tagħna, jew biha nagħlfu disputi spekulattiva u fiergħa. Veru illi nies karnali aġitaw irwieħhom b’mod verbali u kontenzjuż biha, iżda normalment il-qaddisin t’Alla, bit-tagħrif ta’ dottrina hekk sublimi, tgħallmu jitriegħdu f’qalbhom quddiem il-ħniena sovrana t’Alla, u fl-istess ħin ġew motivati biex jimxu fil-vokazzjoni tagħhom b’diliġenza u b’xenqa għal Alla li ħabbhom, kif ukoll jitbeżżlu biex iwettqu kull dover evanġeliku. Qatt ma jaslu biex tant ikunu qalbiena bil-predestinazzjoni illi jinsew l-azzjoni tagħhom.
Talba: “Tabilħaqq int tafna b’isimna, Mulej Ġesù, u dħalt responsabbli għalina. Lilek ingħatalek poplu. Ultimament tara kif tiġbru lkoll biex ikun hemm Sultan wieħed fuq ġens wieħed, merħla waħda b’Ragħaj wieħed. Aħna nithennew, o Sid, kif narawk bil-fidi, tħaddem il-medjazzjoni tiegħek effettivament, u hekk tissokta tagħmel sal-konsumazzjoni taż-żminijiet. Aħna nafdaw fik! Bik ukoll nithennew bir-rebħa fuq il-ħażen u x-xitan. Ammen.”
Comments