“Tabilħaqq jien stupidu aktar minn kulħadd, u m’għandix id-dehen ta’ bniedem. La tgħallimt l-għerf u lanqas nagħraf lilu l-Qaddis. Min tela’ s-sema u niżel? Min ġabar ir-riħ f’idejh? Min ġabar l-ilmijiet fi ħwejġu? Min waqqaf it-trufijiet kollha tal-art? X’jismu? X’jismu ibnu, jekk taf? Kull kelma t’Alla msoffija; hu tarka għal kull min jittama fih. La żżid xejn ma’ kliemu, li ma jlumikx u toħroġ ta’ giddieb” (Proverbji 30:2-6).
X’esperjenza ferrieħa meta naqraw il-wegħdi divini, iċċentrati f’Ġesù. Għal niesu huma dejjem iva u ammen, għall-glorja t’Alla l-Missier. Fil-ġenerożità tiegħu jagħtina biex jurina mħabbtu, iqarribna aktar lejh u nagħrfuh bħala l-fonti ta’ kull barka għalina. Bih m’għandniex bżonn infittxu nixorbu minn bjar imxaqqin li ma jistgħux iżommu ilma.
Kemm inkunu stabbiliti meta nisimgħu l-kelmiet grazzjużi minn fomm Jaħwe: “Jien, iva jien, li nħassar ħtijietek minħabba fija, u ma niftakarx dnubietek” (Isaija 43:25). X’attrazzjoni qawwija għas-sentimenti tagħna meta l-imħabba divina ssejħilna u tgħidilna, “Ftakru fija!” “Hekk jgħid il-Mulej li għamel l-art, il-Mulej li sawwarha, biex iwettaqha; il-Mulej ismu: ‘Sejjaħli, u jien inwieġbek, u nurik ħwejjeġ kbar u qawwija li int ma tafhomx’” (Ġeremija 31:2-3). Le, ma nappellawx fil-vojt; widintu miftuħa għat-tħannin ta’ wliedu.
Hekk jitkebbsu għal darb’ oħra xewqat fir-ruħ, minfuħa fi fjamma, u jitilgħu f’talb ferventi u mħeġġeġ. Jitilgħu qishom inċens infuħ quddiem Alla fidil li jagħmel tajjeb il-wegħdi tiegħu. Qatt ma nistgħu napprezzaw Kelmtu biżżejjed. Qatt ma nistgħu noffrulu radd il-ħajr biżżejjed. Qatt ma nistgħu naduraw suffiċjentement it-Trinità Qaddisa, il-Ħallieq li ġibidna lejh u tana li ngħammru fl-għamajjar tiegħu. Fehtmu hi deċiża; diġà aħna kkonsidrati bħala mqajma ma’ Ibnu u mqiegħda miegħu fl-imkejjen tas-smewwiet (Efesin 2:6).
Jekk Kelmet il-Mulej hi tamitna, għandna fil-pussess tagħna verità eterna, imħabba dejjiema, qawwa infinita, u fedeltà stabbli lkoll ingaġġati favur tagħna. Xi privileġġ speċjali hu dan, illi jkollna d-dikjarazzjonijiet divini bħala l-isperanza tagħna fih. Bihom ngħaddu; bihom u xejn iżjed.
Talba: “Sultan universali u Missier tagħna, int kellimtna u għadek tkellimna, avolja widnejna huma sikwit tqal. Fejjaq it-truxija tagħna. Ħa jkun kliemek melodija għal widnejna, għasel fuq fommna, u l-għaxqa ta’ ruħna. Fuq kollox, agħtina l-ħila nimxu dejjem fid-dawl ta’ Kelmtek, bla ma nilwu la lejn il-lemin u lanqas lejn ix-xellug. F’ġieħ Ibnek nitolbuh dan. Ammen.”
Comments