“Minħabba f’David, il-qaddej tiegħek, la twarrabx wiċċ il-midluk tiegħek. Il-Mulej ħalef fis-sewwa lil David; hu ma jerġax lura mill-ħalfa tiegħu. ‘Mill-frott ta’ ġismek inqiegħed fuq it-tron tiegħek. Jekk uliedek iħarsu l-patt u x-xhieda tiegħi li jien ngħallimhom, uliedhom ukoll joqogħdu fuq it-tron tiegħek għal dejjem.’ Għax il-Mulej għażel lil Sijon; hu xtaqha b’għamara tiegħu” (Salmi 132:10-13).
Storikament, is-salm hu għajta lill-Mulej biex ibierek id-dixxendent ta’ David (Salamun jew xi sultan sussegwenti) li kien qed jirrenja fuq it-tron.
Alla wiegħed lil David li nislu jsaltan warajh. Għalkemm il-linja kienet interrotta minħabba d-diżubbidjenza umana, il-wegħdi divini ma sfawx frustrati. Xorta waħda seħħew fi Kristu, l-iben il-kbir ta’ David, li jwettaq il-patt.
Mhi ebda sorpriża li l-knisja bikrija fehmet das-salm messjanikament, kif allura jeħtieġ nagħmlu aħna wkoll. Ġesù “jkun kbir, u jissemma Bin l-Ogħla, u l-Mulej Alla jagħtih it-tron ta’ David missieru” (Luqa 1:32). Għaldaqstant das-salm hu talba tal-knisja biex il-Missier “jiftakar f’David (Kristu) u fl-afflizzjonijiet kollha tiegħu.” Alla jsalvana fuq il-merti tat-tbatijiet ta’ Ibnu l-għażiż, il-midluk tiegħu. Il-Kalvarju hu tifkira eterna; il-Ħaruf narawh fuq it-tron t’Alla fis-smewwiet. Aktar minn hekk, hu l-kawża meritevoli tal-barkiet spiritwali li rċevejna minn fuq. “Minħabba f’David” iżommna quddiemu; ma jitwarrabx minna. Il-qagħda tagħna hi sikura quddiem it-tron smewwieti minħabba l-rappreżentant u l-garanti divin tagħna.
Talba bħal din, fondata fuq il-medjazzjoni infallibbli ta’ Kristu Ġesù, ma tistax tonqos li tkun mismugħa. Alla ċertament jonoraha. Dan għaliex Kristu wera żelu uniku għal dar il-Missier, għall-qima u l-ġieh tiegħu. Il-leħħa, il-ħeġġa u l-impenn ta’ David, bin Ġessi, kienu biss antiċipazzjoni tal-konsagrazzjoni assoluta ta’ Kristu għall-kawża tal-Missier. Il-Missier iħobb u jitgħaxxaq f’Ibnu, u ladarba aħna f’Ibnu, jitgħaxxaq bina l-fidili tiegħu. Minħabba fi Kristu nbdiet dinastija, saltna ta’ qassisin qaddisin, għax il-Missier, bl-Ispirtu tiegħu, iddetermina li jkollu għamara fuq l-art ħalli hekk isib il-mistrieħ.
Jekk niesu jsibu rpoż fi ħdan il-Mulej, hekk il-Mulej għandu l-mistrieħ tiegħu fil-knisja. Hemm jgħammar, għax xtaqha.
Talba: “O Alla, kien l-għan etern tiegħek li tkabbar il-ħakma u l-qawwa t’Ibnek fuq l-art, ċoè, il-knisja tiegħek. L-għażla ħielsa u sovran tiegħek mhijiex invenzjoni reċenti. Il-patt tiegħek ma’ Sijon hu msejjes fuq l-għażla tiegħek. Infaħħruk u nberkuk, għax hi għażla riżolta f’dak li għoġob lilek, skont xewqtek, bla ħadd ma tak parir.”
Comments