“Żomm il-mudell ta’ kliem korrett li smajt mingħandi, fil-fidi u l-imħabba fi Kristu Ġesù. Għasses id-depożitu t-tajjeb fdat lilek permezz tal-Ispirtu s-Santu li jgħammar ġewwa fina...Fakkarhom f’dawn il-ħwejjeġ. Wissihom solennement quddiem Alla biex ma jinstarmux f’tilwim dwar kliem li mhu utli għalxejn, ħlief li jwassal għar-rovina tas-semmiegħa. Ħabrek biex tippreżenta lilek innifsek quddiem Alla bħala wieħed approvat, ħaddiem li m’għandux mniex jistħi, li jittratta b’akkuratezza l-kelma tal-verità” (2 Timotju 1:13-14; 2:14-15).
M’hemm ebda pedament ieħor għall-knisja ħlief Ġesù. Fuqu, fuq il-verità evanġelika proklamata dwaru, il-knisja ssib is-sigurtà u l-futur tagħha, sakemm tibqa’ żżomm sħiħ id-depożitu sabiħ li rċeviet bħala l-partiketta u l-pilastru tal-verità. Il-prinċipji mgħallma lilha hi obbligata tgħaddihom lid-dinja. Huma immutabbli u universali, u għaldaqstant impossibbli tixjieħ jew issir skaduta. Hi s-soċjetà maħtura, għal kull epoka u lokalità, għal kull qagħda u grad tal-bniedem.
Hi r-riċevitura tal-grazzja, u mdawla bil-verità smewwitija. M’għandha ebda dritt tibdel jew temenda l-artikli ta’ fidi, imma biss twassalhom relevanti għas-soċjetà kontemporanja. Għax Alla tkellem, u l-Kelma tiegħu determinattiva, suprema fuq kull dikjarazzjoni oħra. Id-dottrina biblika, li minnha l-knisja tgħix u toffri l-ħajja lil ħaddieħor, hi msejsa fuq l-ogħla realtà, li tinsab ogħla minnha, fuqha u indipendenti minnha.
Kieku, għas-saħħa tal-argument, il-poplu t’Alla jiżvijja tant gravament li mhux biss jittraskura imma jinsa l-veritajiet sublimi dwar Alla Trinità, ir-riparazzjoni ta’ Kristu, l-irxoxt tiegħu, l-Infern u l-Ġenna, u dottrini oħra, xorta waħda jibqgħu l-pura verità. Il-verità ovvjament mhix determinata minn vot ta’ popolarità, u ma tiġix affettwata skont tiġix emmnuta jew irroftata. In-nies tista’ tiċħadha assolutament u tibqa’ l-verità assoluta. Il-bniedem impossibbli jibdel il-verità allaħija, imma dil-verità sikwit tibdel lilu.
Frattant xejn ma jsir awtomatikament. Nafu biżżejjed illi l-vanġelu, sew jekk ikkonsidrat intellettwalment, moralment jew istituzzjonalment, huwa strett wisq għat-traskurati. L-istandard tiegħu hu rigoruż wisq għal-letarġiċi. L-interess tiegħu hu wiesa’ żżejjed għall-individwalisti irresponsabbli biex b’integrità fil-qalb jidentifikaw irwieħhom miegħu. Iżda n-nies t’Alla, iva, ikunu magħmulin iridu fil-jum meta Sidhom jikxef qawwet driegħu.
Talba: “Mulej Alla, dejjem u kull ħin reġġagħna lura għall-fonti ta’ kull verità spiritwali, il-Kelma li ħarġet minn fommok. Agħtina l-grazzja nemmnuha, mhux niddubitawha; inħobbuha, mhux nittraskurawha; nobduha, mhux nersqu lejha intellettwalment biss; inxandruha fis-safa tagħha, mhux inżommuha għalina nfusha, f’ġieħ Ibnek Ġesù. Ammen.”
Comments